هەمیشە لە ڕووداوە هەستیار و چارەنووسسازەکاندا، ئێمە كرۆك و ڕێچکەی ڕاستەقینەی هەر لایەن و ڕەوتێکمان بۆ دەردەکەوێت. زۆر لە بیرمەندانی هزری سیاسیی لەسەر ئەوە وەستاون کە دیسپلین و کردار پێکەوە، گوتارێکی پێناسەکراو و بانگەشەبۆکراو تەواو دەکەن و ڕووی ڕاستەقینەی دەردەخەن. قسەی ڕووت تا کۆتایی ناچێتە سەر و وەک کورد دەڵێت، بناوانی درۆ کورتە. واتە قسەیەک هەر قسەی ڕووت بێت و کرداری لەگەڵ نەبێت، ئەوا درۆ و بانگەشەیە و درەنگ یان زوو دەپچڕێت و درۆوێژ یان قسەکەرە ڕووتەکە، ڕووگیر دەبێت.
دوای ڕووداوی هێرشکردنە سەر جووتیارانی کەرکووک لەلایەن سوپا و میلیشیاکانی عێراقەوە و خۆڕاگری و جەربەزەیی "محەمەد ئەمین" لە بەرگریی خاک و مافی جووتیاران بە جەمەدانییەوە، دووبارە پرۆسەی بەڕەمزیبوون و سیمبولسازیی جەمەدانی گڕوتینێکی دیکەی گرتەوە. بێگومان جەمەدانی لەوێ هێمای بوێری و خۆڕاگریی ئیرادەیەکی کوردستانی بوو، ئیرادەیەک نە حزب دەناسێت نە لایەن و بەرژەوەندی، بۆیە دەکرێت بڵێین ئەو ڕووداوە دیسان پەراوێزخستن و بە عێراقیکردنی کەرکووکی ڕەت کردەوە و بە دەنگی بەرز هاواری دژی عێراقچیتی و یاریکردن بە چارەنووسی کەرکووک کرد.
سەختە لەناو هەموو ئەو ڕووداوانەی لە یەک ساڵی ڕابردوودا لە عێراق و هەرێمی کوردستان ڕوویان دا، پۆلێنێك بكرێ، بەڵام بە دڵنیاییەوە ئەم ڕووداوە هەر وەک وتم، هەمدیسان چارەنووسی کەرکووکی لەژێر دەستی ئەو لایەنانەی دەیانەویست و دەیانەوێت لە ڕێگەی چەند پۆستی ڕۆتین و خۆنواندنەوە بیخەنە قوڕگی هاوپەیمانەکانیانەوە لە بەغدا و لێرەولەوێ، دەرهێنا و دیسان کوردستانیبوونی کەرکووک و نا گوتنێکی بەرز بە ١٦ی ئۆکتۆبەر و هاوکات بەڵێیەكی مەزنیش بۆ ڕیفراندۆمی سەربەخۆیی هاتەوە سەر تەختەی شانۆی مێژووی کورد.
ئەگەر سەرنجی باری دەروەستیی مێژوویی و ئەخلاقیی کاک محەمەدیش بدەین، بە دوور لە لایەنگری حزبایەتی، ئەوا خۆی پێشمەرگەی یەکێتی نیشتمانیی کوردستان بووە، بەڵام هەم ژیرانە و هەم سەربەرزانە و بە دوور لە تێکەوتن و هەیەجان، کوردستانیبوون هەڵدەبژێرێت و پێداگریی لە مافی رەوای جووتیارانی کورد و ڕەتکردنەوە و بە ڕۆژەڤکردنی ستەمی چەندان ساڵەی شۆڤێنیزمی عەرەبی و تەنانەت عەرەبی بەناو مەدەنی (بە بەرچاوی پارێزگار و بەرپرسە باڵا کوردەکانی یەکێتییەوە لە کەرکووک!) سڵی نەکردەوە، پێم وایە کاک محەمەد بە تەواوەتی خۆی یەکلا کردووەتەوە کێ ئیرادەیەکی جەماوەری و کوردستانی و فافپەروەرانەی هەیە و کێ نیەتی، بۆیە هەر بە سەنگینی و حورمەتەوە خەریکە ڕێچکەی کوردستانیبوون دەگرێتە بەر.
ئاگاداریی ئەو لە کێشەی زەویوزار و خاوەندارێتی موڵک و ماڵ و دەسدرێژی عەرەبی هاوردە و یاساکان، مرۆڤ بەرەو ئەو بیرۆکەیە دەبات کە ئەم کەسە بکرێت بە ئەندامی لێژنەیەک کە بەپێی یاسا لە مادەی 140دا باسی کراوە، تا چارەنووسی ئەو ناوچانە یەکلا دەبێتەوە. کۆی
ئەم ڕووداوە دیسان بابەتی مادەی 140ی هێنایەوە بەر باس کە هەڤاڵانی یەکێتیمان دەیانەوێت لە بەر دڵی هاوپەیمانانی هوتێل ڕەشید پشتگوێی بخەن و بە "زاب خودێ، زاب خودێ"کردن، خۆڵ بکەنە چاوی خەڵک و ئاو بکەنە گوێی جەماوەر.
هاوپێچی هەموو ئەم ڕووداوانە، کێ و کام لایەن بوو یەکەمجار و دووەمجار و دواجار هاتە دەنگ؟ هەموومان دەیزانین. سەردانەکەی دوێنێی مەسروور بارزانی سەرۆک وەزیران بۆ باربانگێك لە سنووری کەرکووک و بەسەرکردنەوەی جووتیاران و پێشمەرگە و فەرماندەکانی، هاوکات وتارەكەی، دەرخەری ئەو ڕاستییە دڵخۆشکەرەن کە کورد و گوتاری کوردستانی هێشتا لە گڕوتینی خۆیدایە و کێشە و ململانێ و گوشارەكان لەسەر خواستە ڕەواکانی ئێمە کاریگەریی دانانێت و مافخوازیمان نیشانەی حەقبوونمانە لەسەر ئەو خاک و موڵکە.
ئاماژەی ژیرانە و بوێرانەی سەرۆک وەزیران لەسەر ئەو ناونانە سیاسی و فێڵبازانەیەی کە ناوچە کوردستانییەکانیان لە یاسای عێراقدا کرد بە ناوچە "ناکۆکی لەسەرەکان"، نەک هەر هیوا و ئومێدێکی قووڵ و پتەو بە جووتیارانی ئەوێ دەدات، بەڵکوو مزگێنیدەری ئەوەیشە کە حکوومەتی هەرێم و سەرۆکەکەی لەسەر بستێک خاکی وڵات سازش ناکەن و قسە لە ڕوو و بوێرن.
خۆی لە راستیدا لە هەر ڕوانگەیەکەوە چاوی لێ بکەین، ئەو ناونانە سیاسییە لەسەر ناوچە کوردستانییە دابڕێنراوەکان، هەڵەیەکی گەورە بووە و دەبێت چاک بکرێتەوە، ڕەنگە هۆی ئەوەی کورد ئەم هەڵانەی بەسەردا تێدەپەڕێت، هەر هەمان یەکنەگرتوویی و یەکدەنگنەبوونی هەمیشەیی بێت و دواجار هەر کورد خۆیشی زەرەر دەکات.
ئەم لێداون و بەسەرکردنەوەیەی سەرۆک وەزیران، نەک تەنیا بە پیرەوەچوونی جووتیارانێکی ستەملێکراو بوو، بەڵکوو بە دەنگەوەچوونی هەموو کەرکووک و داکۆکیکردنەوەیەکی بوێرانەی تر بوو لە شوناسنامەی کوردستانیی کەرکووک.
هیوادارم ئەو خاڵەی کاک محەمەد باسی کرد واتە نەرمینواندنی لایەنەکان بۆ پێکهێنانی حکوومەتی کوردستان، ڕەچاو بکرێت و لەپێناو خزمەتکردنی دۆزی کورد و هاووڵاتیانی کوردستان بە تایبەتی لە کەرکووک، ناکۆکی و بەرژەوەندییە بەرتەسکە حزبی و تاکەکەسییەکان وەلا بنرێت.
ئێمە دەبێت چاومان لەسەر کۆی ئەو گۆڕانکارییانە بێت کە لە ناوچەکەدا خەریکە ڕوو دەدەن، یەکگرتوویی کورد لە باشوور نەک تەنیا خزمەت بە دۆزی کورد لەناو یارییەکانی عێراقی داگیرکەردا دەکات، بەڵکوو ڕیخۆشکەری زیاتریشە بۆ ڕۆڵگێڕانی مێژوویی باشووری کوردستان لە هاوکێشەی سیاسیی پارچەکانی دیکەی کوردستان و بەتایبەتی باکور و ڕۆژئاوا، لەم قۆناغەدا.