مرۆڤی ژیر، هەرگیز ئەزموونێك دووبارە ناكاتەوە كە پێشتر تاقی كردووەتەوە و شكستی تێدا هێناوە، هەروەها هەڵەیەكیش ناكات كە پێشتر چەندان جاری تر كردوویەتی و هەر خۆی باجەكەی داوە. وەزیری دارایی عێراق، هیچ مانگێگ نییە پاساوێك بۆ مووچەی فەرمانبەرانی هەرێمی كوردستان كە سەرەتای ئەمساڵ بەشێوەیەكی كۆنكریتی لەلایەن هەردوو شاندی دارایی هەرێم و بەغداوە، بۆ ساڵی 2025 ڕێككەوتنی لەسەر كراوە، دوا نەخات و بیانوویەك نەدۆزێتەوە، كەچی هەر خۆی دوای چەند ڕۆژێك لە دواخستنی، بە ڕسوایی و زەلیلانە، واژووی دەكات و بە ناچاری مووچە دەنێرێت كە جگە لە شەرمەزاری، هیچی تری بۆ نامێنێتەوە.
ئەم هەڵوێستەی وەزیری دارایی عێراق، خزمەت بە پێگە و ناوبانگ و مێژووی سیاسیی ئەو ناكات، بە تایبەتی كە هەڵبژاردنی پەرلەمانی عێراق لە پێشە و ئەستەمە ئەو بكرێتەوە وەزیری دارایی و دواجار بە مێژوویەكی ناشیرین و بێزراوەوە لەلایەن ئێمەوە، دەچێتە پەراوێزی مێژوو.
كاتی خۆی (بەدرەدین عەلی) ئەم پیاوەی لە گەرمەی شۆڕشی ئەیلوولدا، قایمقامی ڕواندز و پاشان پارێزگاری هەولێر بوو، یەكێك بوو لە دڕندەترین بەرپرسی سەربازیی ڕژێم و بە هەزاران كوردی ئەشكەنجە و زیندانی كرد و لە سێدارە دا، واتا تا لە پۆستەكەی بوو، بەو شێوە نامرۆییە ڕەفتاری دەكرد، كە خانەنشین بوو، تەریك و تەنیا مایەوە، تا ڕۆژێكیان قارەمانێكی شۆڕشی ئەیلوول لە بەردەم ماڵەكەی، تۆڵەی سەتان قارەمان و پێشمەرگەی لێ كردەوە و بە سزای خۆی گەیاند.
بێگومان مەبەستی ئێمە لێرەدا بەراوردكردنی ئەوانە نییە بە یەكتر، بەڵكو دەرخستنی ئەو ڕاستییەیە كە پۆست و پێگە، بە تایبەتیش لە عێراق، كاتێ دەبنە ئامرازێك بۆ سڕینەوە و لە ناوبردن و هەوڵدان بۆ توانەوەی كورد، نەك هەر هیچ ئاكامێكیان نەبووە، بگرە كورد بە هێزیی زیاتریشەوە تێی هەڵچووەتەوە. لەو سۆنگەیەوە ماوەی 10 ساڵە بەغدا مووچە وەك كارتێكی سووتاو لە پێناو نەهێشتن و لاوازكردنی قەوارە دەستوورییەكەی هەرێم و نەمانی فیدراڵی و بە عێراقیكردنەوەی كوردستان و هەڵوەشاندنەوەی دامەزراوە نیشتمانییەكان، بەكار دێنێت، بێ ئەوەی هیچ ئەنجامێكی هەبووبێت.
10 ساڵ زیاترە بەغدا بە ئەنقەست قەیرانی دارایی بۆ هەرێم دروست كردووە و قووڵتری دەكاتەوە، تا لەو ڕێگەیەوە ئاشتەوایی كۆمەڵایەتیی هەرێمی كوردستان و دۆخی ناوخۆییمان بشڵەقێنێت، كەچی هەموو جارێ بە دۆڕاویی لەو یاریی و هاوكێشەیە چووەتە دەر. كەواتە دواخستن و یاریكردن بە مووچەی فەرمانبەرانی كوردستان، جگە لە كارتێكی هەزارجار بەكارهاتوو، هیچ مانایەكی هەیە؟
بەغدا دەیەوێت مووچە وەك كارتی خۆ بەدەستەوەدانی ئێمە بەكار بێنێت، بێ ئەوەی لەو ڕاستییە گەیشتبێت كە وەك بارزانی دووپاتی لێ دەكاتەوە "كورد مردن هەڵدەبژێرێت، بەڵام بە زەلیلی ناژی".
بەپێی دەستوور، هەرێمی كوردستان بە ناچاری بەشێكە لە عێراق، دەبێ هەموو مافێكی لە ڕووی بودجە و خەرجی و بنیاتنانی ژێرخانی ئابووری و خزمەتگوزارییەوە هەبێت، كەچی بە داخەوە تەنیا مووچەكە دەدات، ئەویش بەو ڕێگە نامرۆیی و ناڕەوایەی كە هەموو مانگێك دوای دەخەن، بە پاساوی بێ مانا.
جێی داخە ئەوەی زیاتر زەوینەی بەكارهێنانی ئەو كارتەی بۆ بەغدا فراوانتر كردووە، هەر تەنیا جاشە كوردەكان نین، بەڵكو بێ هەڵوێستی و یەكنەبوونی گوتارێكی كوردانە و هەرێمانەیە بەرانبەر بەغدا، تا بە دەستی پۆڵایینەوە ڕووبەڕووی ببینەوە. هێزی وا هەیە بە ناوی ئۆپۆزسیۆن و ڕقی سیاسی لە پارتییەوە، ڕەوایەتی دەداتە ئەو ڕەفتارە فاشییەی بەغدا بەرانبەر بە هەرێم، گوایە ئەمە دژایەتیی پارتییە نەك خەڵكی هەرێمی كوردستان؟!
ئەم بێ هەڵوێستییەی بەشێك لە هێزە سیاسییەكانی ئێمە، دەیانخاتە بەردەم بەرپرسیاریەتییەكی مێژوویی و نەتەوەیی گەورە لە داهاتوودا، بێگومان باجەكەیشی دەدەن. بڕوام وایە بەغدا مووچە دەنێرێت، بەغدا لە بەردەم دەستێكدایە كە بواری ئەوەی تێدا نییە ببڕێت، بەڵكو بە ناچاری دەبێ ماچی بكات، وەك ئەوەی لە ڕابردوودا كردوویەتی.