لەگەڵ دەستبەكاربوونی مەسروور بارزانی وەك سەرۆكی حكوومەتی هەرێمی كوردستان و دامەزراندنی كابینەی نۆ، لەگەڵ ئەوەی زۆر قەیرانی سروشتی و دەسكرد ڕوویان دا، بەڵام دەستەوەستان نەبوو، سەختیی دۆخەكەی گۆڕی بۆ ئاوەدانی لە سەرجەم شار و شارۆچكەكانی كوردستان و سێكتەرە جیاوازەكانی بە پلان بووژاندەوە. پلانی یەكەمی سەرۆك وەزیران بە ئەلیكترۆنیكردنی كاروبارەكانی حكوومەت و فەرمانگەكان بوو كە سەركەوتنێكی زۆر گەورەی بە دەست هێناوە.
"هەژماری من، كارەبا، پڕۆژەی ئاو، بەشێكی تری بیرۆكەكان بوون كە سەركەوتوانە جێبەجێ كران و بووە هۆی بەرەوپێشبردن و خزمەتكردنی هاووڵاتییان. پڕۆژەی ڕێگەوبان و نۆژەنكردنەی شەقامە كۆنەكان، دروستكردنی ئۆتۆبان و پردی تازە و دانانی كامێرای تیژڕۆیی بۆ خزمەتكردنی شۆفێر و سەلامەتیی گشتی، كەمكردنەوەی ڕووداوی هاتوچۆی 100% لێ كەوتووەتەوە و ئامانجەكانی بە خێرایی پێكا، بۆیە ئێستە هەموو ئەوانەی سەرەتا دژی دانانی كامێرا بوون، ئێستە شانازیی پێوە دەكەن.
دروستكردنی پۆند و بەنداو و چاندنی ملیۆنان دار و پشتێنەی سەوزایی بۆ گۆڕانی كەشوهەوای پایتەخت، ئامادەكارییەكی بەرچاو و پلان بۆ داڕێژراوبوو بۆ ڕووبەڕووبوونەوەی گۆڕانی كەشوهەوا كە جیهانی نوێ زۆر جەختی لەسەر دەكاتەوە و بە پلانە وردەكانی مەسروور بارزانی، كوردستان زووتر خۆی بۆ ئامادە دەكات.
پشتگیریی بەرهەمی ناوخۆیی و پاڵپشتیی جووتیاران بۆ ساغكردنەوەی بەرهەكانیان و چوونە سەر كێڵگە و بەروبوومەكانی جووتیاران لەلایەن سەرۆكی حكوومەت خۆیەوە، دنیایەكی تازەی لە بواری كشتوكاڵدا بەدی هێنا و جووتیاری لەگەڵ خاكەكەی ئاشت كردەوە، ئەمە بەرهەمی ناوخۆی وەها زیاد كرد، ڕاستەوخۆ بیر لە ناردنە دەرەوەی بكرێت و ئێستە دەیان جۆری بەرهەمی ناوخۆیی كوردستان لە ماركێت و بازاڕەكانی وڵاتاندا دەبینرێن و لە داهاتوو زیاتریش دەبێت.
پرۆژەكان زۆرن و كاروانەكە بەردەوامە، خۆشبەختانە ئەمانە هەر قسە و دورستكردنی ئومێدی درۆینە نین، بەڵام خەڵك خۆی رۆژانە سوود لە پرۆژەكان دەبینێت و بەسەر شەقامەكاندا گوزەر دەكات، لە تەنیشت بەنداوەكان سەیران دەكات و پارەی مامەڵەكانی لە مۆبایلەكەیەوە دەدات، لە سایەی ڕووناكیدا حەساوەتەوە و خەمی ئاوی خواردنەوەی نەماوە بۆ هەمیشە، بۆیە ئەمانە زانیاریی نوێ نین، بەڵام گرنگە پەرە بە كولتووری سوپاسگوزاری لە بەرانبەر چاكەكاندا بدەین.