ره‌نگه ل كوردستانێ گه‌له‌ك مزگه‌فت هه‌بن دیرۆكه‌كا كه‌ڤنار هه‌بیت، ل ناوچه‌داریا داره‌توو یا سه‌ر ب ده‌ڤه‌رداریا به‌رده‌ڕه‌ش، ئه‌ڤه 215 ساله مزگه‌فته‌ك ب ئاخێ هاتییه چێكرن و هه‌تا نوكه ژی نڤێژ و په‌رستن دهێته كرن.
عه‌بدوڵا جومعه وه‌لاتییه‌كێ ده‌ڤه‌را به‌رده‌ڕه‌شێیه بۆ "وشه" گۆت، ل سالا 1805ز ئه‌ڤ مزگه‌فته ل ناوچه‌داریا داره‌توو هاتییه چێكرن و ئه‌ڤه چه‌ندان ساله ژلایێ مالباته‌كێ بناڤێ میكائیل عه‌بدوڵا دهێته سه‌رپه‌رشتیكرن، هه‌تا نوكه ژی خه‌لك بكار دئینن بۆ نڤێژ و گوتاران.
زێده‌تر گۆت "مزگه‌فت ب لبنێن ئاخێ هاتییه چێكرن و ب كاریتا و ئاخێ سه‌رێ وێ هاتییه داپوشین، ناڤێ وێ كریه مزگه‌فتا كه‌ڤن، دیوارێن وێ ل سه‌ر پتری مه‌تره‌كێ هاتییه چێكرن و پێكدهێت ژ دوو هولێن نڤێژا و هه‌ر ئێك ژ وان هولا نێزیكێ 15م درێژه و 10م پانه"
ناڤبری دیاركر ژی كو ل سالا 1955 جاره‌كێ هاتییه نوژه‌نكرن، به‌لێ نوژه‌نكرنا وێ ژی هه‌ر ب ئاخ بویه و زێده‌تر گۆت، "ژبه‌ركو ژیێ مزگه‌فتێ زوره جهێن شوله‌ژێ ناهێلن بهێته خراپكرن و نوكه وه‌ك شینواره‌كێ ده‌ڤه‌رێ مایه و دهێته پاراستن و په‌رستن و نڤێژ و بانگدان تێدا به‌رده‌وام دهێته‌كرن"