فه‌هیم عه‌بدوللا، سه‌رۆكێ جڤاتا پارێزگه‌ها دهۆكێ، د چارچوڤێ كومبوونا ئه‌ڤرۆ یا جڤاتا پارێزگه‌ها دهۆكێ دیاركر كو ئه‌و وه‌كو جڤات و خه‌لكێ پارێزگه‌ها دهۆكێ دلگرانن ب وه‌غه‌ركرنا فرسه‌ت سۆفى، پارێزگارێ هه‌ولێرێ و هه‌ڤخه‌میا خوه ده‌ردبرن.
فه‌هیم عه‌بدوللا زێده‌تر گۆت "فرسه‌ت سۆفى دده‌مه‌كێ كورت دا شیا جهێ خوه ددلێ خه‌لكى دا بكه‌ت و دوارێ خزمه‌تگۆزارى ژى دا ب گوره‌ى شیان كار و چالاكیێن ژ هه‌ژى بۆ خه‌لكێ پارێزگه‌ها هه‌ولێرێ كرن، دیسان د به‌رهنگاربوونا ڤایرۆسا كۆرۆنایێ ژى دا روله‌كێ به‌رچاڤ هه‌بوو و ل داویێ ژى گیانێ خوه ل سه‌ر پاراستنا گیانێ وه‌لاتیان ژ ڤایرۆسا كۆرۆنایێ دانا، بناڤێ جڤاتا پارێزگه‌ها دهۆكێ و خه‌لكێ دهۆكێ ژى سه‌ره‌خوشیێ ل مالیاتا پارێزگارێ هه‌ولێر و پارتى دیموكراتى كوردستان و كه‌سوكار و خه‌لكێ پارێزگه‌ها هه‌ولێرێ ب گشتى دكه‌ین، دخوازین جهێ وى بحه‌شت بیت و سه‌بر و هه‌دارێ ژى بده‌ت كه‌سوكار و مالیات و خێزانا وى"
ژلایه‌كێ دنڤه، سه‌رۆكێ جڤاتا پارێزگه‌ها دهۆكێ گۆت "ئه‌ڤرۆ جڤاتا پارێزگه‌ها دهۆكێ ل سه‌ر په‌یره‌وێ باژێرڤانیان كومبوو ژبه‌ركو وه‌كو جڤاتا پارێزگه‌ها دهۆكێ مه چه‌ند تێبینى ل سه‌ر هه‌نه و چه‌ندان كێماسى تێدا هه‌نه، پشتى كو وه‌زیرێ باژێرڤانى و گه‌شتوگۆزار، ساسان عه‌ونى سه‌ره‌دانا پارێزگه‌ها دهۆكێ كرى و مه ئه‌ڤ یه‌ك گه‌هاندیێ ئه‌وى ژى سوزدا كو چاره‌سه‌ریا ڤێ یه‌كێ بهێته‌كرن داكو چوو سته‌م ل خه‌لكێ دهۆكێ نه‌هێته‌كرن، دیسان ژلایه‌كێ دن یێ كومبوونێ مه ده‌نگ ل سه‌ر ئالوگورا چه‌ند كه‌سان دناڤا لژنه‌یێن نافخوه یێن جڤاكێ دا، داكو ب شێوازه‌كێ باشتر خزمه‌تا وه‌لاتیان بهێته‌كرن"