باژێرێ دهۆک کو دکەڤیتە پشکا باکور یا روژئاڤایێ هەرێما کوردستانێ ب جوانترین و پاقژتزین باژێر ل عیراق و کوردستانێ هاتە دیارکرن، شارەزایەکێ گەشتوگۆزارێ ژی ددەت دیارکرن کو جوانیا پارێزگەها دهۆکێ ژ روویێ گەشتوۆزاری بویە ئەگەر دهۆک بڤی رەنگی جوان بمینیت
د. عەلی تەتەر، پارێزگارێ دهۆکێ دیارکر کو ب گورەی راپرسیان و دوڤچوناندا دیاربویە کو باژێرێ دهۆکێ ب جوانترین وپاقژترین باژێر ل عیراق و کوردستانێ هاتیە دیارکرن و گوت، ژدل سوپاسیا خەلکێ خۆشتڤیێ دهۆکێ دکەم؛ بەلێ د هەمان دەم دا داخوازێ دکەم پتر باژێرێ خوە پاک و خاوێن ڕابگرن و خوە بەرپرس بزانن بەرانبەر بهوست بهوستا باژێرێ خوە هەر کەسەکێ هەوە ل هەموو جهەکێ هەلویست هەبیت بەرانبەر هەر کەسەکێ کو باژێرێ هەوە پاک ڕانەگریت.
زێدەتر گوت، ب پشتەڤانی و ب بزاڤا بێ راوەستانا هەوە، پشتراست بن باژێرێ دهۆکێ دێ پتر پێشکەڤیت و ئەڤە ژی دەولەت سەرێ هەوەیە.
عەبدولخالق زێباری، ئێک ژ شارەزایێن گەشتیاری یە ل پارێزگەها دهۆکێ دیارکر کو ب نمرە ئێک هەبونا رویەکێ گەشتیاری ل پارێزگەها دهۆکێ بویە ئەگەر دهۆک ب رەنگێ نوکە جوان بیت و گوت، دهۆک ئێکە ژ باژێر و پارێگەهێ کەڤنار، هەبونا چەندین جهێن شینوار وشارستانی بەلگەیا ڤێیەکێ یە، زێدەباری کو دهۆک دکەڤیتە ناوچەییەکا چیایی و پرانیا ئەردێ وێ چیاییە، هەبونا چیا و دل و نها و چەند رووبار بویە ئەگەر کو روویێ دهۆکێ ب جوانی دیاربیت و چەندین تاڤگە و جهێن گەشتیاری یێن خورسکی دیاربن، ئەڤە زێدەباری کو خەلکێ دهۆکێ هەست ب بەرپرسیارەتی دکەن و ژینگەهـ و سروشتێ خوە دپارێزن و گرنگی ب یاسا و رەفتار و سەرەدەریا ژینگەهی دکەن، خالەکا دی یا دەرکەفتنا جونیا دهۆکێ د زڤریت بۆ پوتەدانا حوکمەتا هەرێما کوردستانێ ب ئاڤەدانی و جوانکرنا سیمایێ دهۆکێ و چێکرنا چەندین جهێن گوزاری و ئاڤەدانی ل دەفەرێن جودایێن دهۆکێ.
دهۆک ل سالا 1969ێ بویە پارێزگەهـ و پێکدهێت ژ شەش قەزا و ئیدارەکا سەربخوە و پتری 24 ناحیان، زێدەباری هەبونا پتری دوو هزار گوندێن ئاڤەدان و نەئاڤەدان، نێزیکێ 70%ێ چیا پێکدهێت.