ده‌رباره‌ی هەموارکرنا یاسایا ڕزگاربوویێن ئێزدی ژلایێ په‌رله‌مانێ عیراقێ ڤە، ڕێڤه‌به‌رێ گشتیێ كاروبارێن ئێزدیان دیارکر کو هه‌ر ده‌ستكاریه‌ك دڤێ یاسایێ دا بهێته كرن دبیتە پێشلكاری هه‌مبه‌ر مافێ كچ و ژنێن ژ ده‌ستێ داعش قورتالبووین و وه‌ك جڤاكا ئێزدی نه‌رازیبوونا خوە دیار دكه‌ین.
سعود مستۆ، ڕێڤه‌به‌رێ گشتیێ كاروبارێن ئێزدیان دیاركر یاسایا ڕزگاربوویان ئه‌گه‌ر ب ئازایی و وێره‌كی و به‌رخودان و قوربانیا كچ و ژنێن ئێزدی و پشته‌ڤانیا مالباتێن وان و جڤاكا ئێزدی و میر و جڤاتا رۆحانی نه‌بایە، یاسایێ هه‌بوون نه‌دبوو و وت، ژ بیرۆكا وێ به‌رسڤدانه‌ك بوو بۆ ئه‌و قوربانیا كچ و ژنێن ئێزدی دایی و ل سه‌ر وی بنه‌مایی ژی یا هاتیه دارشتن و ئه‌و ژینگه‌هـ ل به‌غدا درووستبوو و فشاره‌كا نێڤده‌وله‌تی ل جڤاتا ئاسایشێ و ب پشته‌ڤانیا په‌رله‌مانتارێن كورد ئه‌ڤ یاسایه ده‌رباز بوو، ژبه‌ر هندێ ژی ئه‌م دبێژین هه‌ر ده‌ستكاریه‌ك دڤێ یاسایێ دا بێته كرن ئه‌ڤ پێشلكاریه بۆ وێ مافێ تایبه‌تمه‌ند ب ته‌خه‌كا گرنگا جڤاكا ئێزدی ڤه ئه‌و ژی كچێن ژ ده‌ستێ داعش قورتالبووین و وه‌ك جڤاكا ئێزدی نه‌رازیبوونا خۆ دیار دكه‌ین.
زێده‌تر گۆت، یا خویایه په‌رله‌مانێ عیراقێ نیازه‌كا خراب پێ هه‌یه ئه‌گه‌ر نه یاسا یا ڕۆن و ئاشكرایه كو ب مێژوویه‌كا ده‌ستنیشانكری ل ڕێككه‌فتی 3/8/2014 ده‌ست پێ دكه‌ت كو مفاداربن ژ ڤێ یاسایێ و ناڤێن پێكهاتێن دی ژی وه‌كو توركمان و شه‌به‌ك و مه‌سیحی یێن هاتین ئه‌گه‌ر نه وان چ زه‌ره‌رێن دی هه‌نه ژبلی ڤالاكرنا ڤێ یاسایێ ژ ناڤه‌رۆك بۆ جڤاك و ژنا ئێزدی ده‌ستنیشانكری.
سعود مستۆ دیارکر ژی کو باوه‌ریا جڤاكا ئێزدی ب حكومه‌تا فیدرالا عیراقێ و یاسادانه‌رێن وێ یا لاوازه و زێدەتر گوت، ئه‌ڤ یاسایه پێنگاڤه‌كا گه‌له‌ك باشبوو ئه‌م ل گه‌ل هندێ نه هه‌ر كه‌سه‌كی زه‌ره‌رمه‌ند بت ل سه‌ر ده‌ستێ تیرۆرستێن داعش چ هه‌ر كچ و ژنه‌ك و پێكهاته‌كێ عیراقێ بت بگه‌هته مافێ خۆ،ژبه‌ر هندێ ژی ئه‌ڤ یاسایه وان هاتیه دانان بۆ وێ كۆمكوژیا ب سه‌رێ ئێزدیان دا هاتی.
ڕێڤه‌به‌رێ گشتیێ كاروبارێن ئێزدیان گوتژی، هه‌تا نۆكه په‌رله‌مانێ عیراقێ وه‌كو په‌رله‌مانێن دی ڕوونشتنه‌ك ل سه‌ر كۆمكوژیێ و دانپێدان ژی پێ نه‌كریه،ژبلی دڤێ یاسایێ دا دئێك برگه‌یێ دا ئاماژێ دكه‌ت كو ئه‌ڤا بسه‌رێ ئێزدیان دا هاتی كۆمكوژییه و ئه‌و خالێن په‌رله‌مانێ عیراقێ دڤێت ده‌ستكاریێ تێدا بكه‌ت و دبنه‌ره‌ت دا ئه‌ڤ یاسایه ژ سێ برگه‌یان پێك دئێت ئه‌و ژی ناڤێ یاسایێ ژنا ئێزدی و ژ مێژوویا 10/6/2014 ژێ مفادارن و هه‌موو زارۆیێن ئێزدی ب شێوه‌كی گشتی ب خۆ ڤه دگرت و مخابن ژینگه‌هه‌ك ل به‌غدا یا دروستكری بیێ كو ڕاوێژ و بۆچۆنا ئێزدیان و كه‌سوكارێن قوربانیان وه‌ربگرن كو ڤێ یاسایێ دێ ڕاستڤه‌كه‌ن، ب مخابنی ڤه چوو دۆسه‌یێن ئێزدیان دئه‌وله‌ویه‌تێن حكومه‌تا فیدرال دا نینن و ئاگه‌هـ ل ڕه‌وشا ئێزدیان نینه و نیازا وان ئه‌وه ڤێ یاسایێ بگوهۆرن و چ گرنگیدان بۆ جڤاكا ئێزدی نه‌كریه.
لژنەیا شەهیدان و قوربانیان و زیندانیێن سیاسی ل پەرلەمانێ عیراقێ پێشنیارەك بۆ سەرۆکاتیا جڤاتێ بلندکریە و داخاز دکەن یاسایا تایبەت ب ڕزگاربوویێن ئێزدی ڤە بێتە هەموارکرن، ڤێ چەندێ ژی ئێزدی دلگران کرینە.