پشتی سەرەدانا سەروک بارزانی بو دەڤەرا بادینان و کومبون ل گەل خەلکێ دەڤەرێن جودا، خەلکی ژ نێزیک گل و گازندە و داخوازیێن خوە گەهاندنێ، ئێک ژ وان داخوازیان ئازادکرنا دەڤەرێن نێروەرێکان بویە ل سنورێ ناحیا شێلادزێ، شەڤا بوری و سپێدهیا ئەڤڕۆ وەکو قوناغا ئێکێ و دەستپێک هێزەکا مەزن یا زێرەڤانێن سنوری یا عیراقێ گەهشتن گەلیێ بالندا و بەر ب دەڤەرا نێروەوریکان چون، ژێدەر دوپات دکەن کو ئەو هێز رەنگە هەتا رێنجبراخە بچن.
ژیدەرەکێ ل دەڤەرا شێلادزێ بو "وشە" گوت، شەڤا بوری و سێدەهیا ئەڤڕۆ هێزەکا زور یا زێرەڤانێن سنوری یا سەر ب سوپایێ عیراقێ ب چەکێ گران و سڤک ڤە، ب جەبەخاجە و ترومبێلێن درع ل گەل هژمارەکا زور یا سەربازان گەهشتن دەرێ گەلیێ بالندا ل شێلادزێ.
زێدەتر گوت، پشتی مانەڤا بو چەند دەمژمێرا ئەو هێز بەر ب دەڤەرا نێروەورێکان چون و نوکە گەهشتینە ئاڤا مارک و دەشتا سیتە کو پتری 20کم ل سەنتەرێ ناحیا شێلادزێ دورن و دەمێن بهێت دێ گەهن رێنجبارخە کو پتری 50کم ل شێلادزێ دورە.
ب گورەی زانیاریێن وشە، ئەو هێزە دێ ل نێزیک دەڤەرێن سنوری هێنە جێگیرکرن بو هندێ ئەمن و ئاسایشا دەڤەرا شێلادزێ یا پاراستی بیت ، قوناغا دوویێ دا ئەگەر هەیە رێ ل هەمبەر وەلاتی و خەلکێ دەڤەرێ ڤەکەن کو دەما پتری دوو سالایە هاتیە گرتن و خەلک نەشێن بچنە سەر جهـ و وارێن خوە.
دەڤەرا نێروەورێکان، پێکدهێت پتری 85 گوندان و هەموو ژی ژبەر شەر و ئالوزیێن عیراق و تورکیا ل سالا 1975ێ هاتینە چولکرن و خەلکێ وێ ل شێلادزێ و دێرەلوک و چەند دەڤەریێن دی یێن پارێزگەها دهۆکێ هاتینە بنەجهکرن، پشتی سەرهلدانا بهارا سالا 1991ێ جارەکا دی خەلک ڤەگەریا سەر جهـ و وارێن خوە و دەست ب چاندن و شینکرنا رەز و بیستان و خودانکرنا تەرشوکەوالی کر و ژیانەکا نوو دەستپێکر، بەلێ پشتی کو شەر و ئالوزی دناڤبەرا پارکا کارکەرێن کوردستانێ و تورکیا دروست بوی ب تایبەتی پشتی ئازادیا عیراقێ، جارەکا دی نە ئارامی کەفتە دەڤەرێ و خەلک ل سەر گوندەوارێن خوە هاتنە بوردمانکرن و شەهیدکرن و هەتا نوکە پتری 100 کەس ژ خەلکێ سڤێل یێ دەڤەرێ، ژلایێ تورکیا هاتینە شەهید و بریندارکرن، دەما پتری دوو سالایە دەرگەهێ گەلیێ بالندا ب ئیکجاری لسەر خەلکی هاتیە گرتن و خەلک بێ بەهر بویە ژ دیتنا گوندەوارێن خوە و نەشێن مفای ژێوەربگرن.
ژێدەری دیارکر ژی کو پشتی کو سالا بوری سەروک مەسعود بارزانی ژ نێزیک سەرەدانا دەڤەرا ئامێدیێ کری و ل گەل تەخ و چینێن جودایێن سنورێ دەڤەرا ئامێدیێ کوم بوی، گەلەک داخوازی ژلایێ خەلکی گەهشتن سەرۆک بارزانی، ئێک ژ وان داخوازیان ڤەکرنا دەرگەهێ گەلیێ بالندا بویە هەمبەر خەلکێ دەڤەرێ داکو ئەو بشێن بچنە سەر گوندەوارێن خوە، ژێدەر دوپات دکەن کو سەروک بارزانی داخوازیێن خەلکی بەرچاڤ وەرگرتن و کارئاسانی بو ڤێ یەکێ کرینە، لەوا د نوکە دا وەکو قوناغا ئێکێ و ئاماژەییەکا دلخوشکەر ب هەڤکاری ل گەل زێرەڤانێن سنوری یێن عیراقێ و پێشمەرگەی، هێز بەر ب دەڤەرا نێروەوریکان چو و ئومێدەکا دلخوشکەر هەیە کو ل دەمێن بهێت رێ ل هەمبەر خەلکی ژی بهێتە ڤەکرن کو بچنە سەر جهـ و وارێن خوە.
شێلادزێ ئێک ژ مەزنترین ناحیێن سەر ب پارێزگەها دهۆکێ و کوردستانێ یە، پتری 45 هزار کەس تێدا دژین، 98کم ل دهۆکێ دورە و ژ 92 گوندان پێکدهێت، ل سالا 2013ێ ب بریارا سەروک بارزانی بویە ناحی، ب دەڤەرەکا گەشتیاری و بازرگانی و سنوری دهێتە نیاسین.