ئاراس ئێک ژ وان گەنجێن گوندێ دێویکێ یا سەر ب دەڤەرا زێبارێ یە ل سنورێ ناحیا شێلادزێ کو دوهی د روودانەکا وەحشیگەرانە ژلایێ فڕۆکێن تورکیا ل بنارێ چیایێ پشتا گۆندێ خوە هاتە شەهیدکرن.
شەهیدکرنا ئاراسی ل گەل کەسەکێ دن یێ هەمان گوندی، کارڤەدان و خەمبارین هەری زور ل دەڤ خەلکێ دەڤەرێ دروستکرن.
سەدیق عەبدوللا، ئێک ژ خەلکێ دەڤەرێ و نیسسێن ئاراسی دبێژیت، ئاراس ل گەل دوو ژ کەسێن دی یێن نێزیکێ خوە بۆ پەیداکرنا پاریێ ژیانێ قەستا ئاقارێ نێزیک گوندی کریە، بەلێ مخابن ئەو و کەسەکێ دی دهێنە شەهیدکرن.
ئاراس ـی سالا بوری خێزان پیکئینابو و وەکو سکرتێر ل نەخوشخانا هیوا یا تایبەت ل شێلادزێ ل گەل نوژدارەکێ کار دکر و دەرچویێ پشکا تاقیگەهێ یە ل ئامێدیێ و دەما نێزیکێ پینج سالایە ل کەرتێ ساخلەمیێ ل دەڤەرا شێلادزێ خزمەتا خەلکی دکەت، نێزیکێ چوار هەیفایە خودایێ مەزن ئەڤ کچا ل بەر سینگێ وی ب رزقی کری، بەلێ بەری کو تێر هەمبێزا کچا خوە بکەت، شەهید دبیت.
چێڕۆکا ئاراس ـی ل ڤێرە ب دوماهی ناهێت، بەلکو ئاراس مروڤەکێ جڤاکی و روخوش و ڤەکری بو، گەلەک حەژ ژ وەلات و ئاخ و نیشتمان و خزمەتکرنا خەلکی دکر، د کار و پێشەیێ خوە دا بزانەکا خورت دکر، گەلەک حەژ ژ کارێ خوە دکر و دلسووز بویە بۆ کارێ خوە.