لژێرچاڤدێریا راستەوخو یا مەسروور بارزانی، سەڕۆکی حوکمەتا هەرێما کوردستانێ، دێ مەزنترین ئاهەنگا نەورۆزێ ل جیهانێ ل ئاکرێ هێتەکرن و کومەکا سوپرازان هەیە.
د. دولاوەر هەرکی، قایمقامێ ئاکرێ دیارکر کو ئەڤ سالە نەورۆزا ئاکرێ دێ جیاوازیێن زور ل گەل سالێن بوری هەبیت و گوت، لژێرچاڤدێریا راستەوخو یا مەسروور بارزانی، سەڕۆکی حوکمەتا هەرێما کوردستانێ، ب ئامادەبونا هژمارەکا زور یا نونەرو کونسولخانە و بەرپرسێن حوکمی و حزبی ل عیراق و کوردستانێ، هژمارەکا زور یا مێهڤان و گەشتیار و خەلکێ کوردستان و دەڤەرێ، دێ مەزنترین ئاهەنگا نەورۆزێ ل ئاکرێ هێتەکرن و کومەکا سوپرازێن جیاواز دێ هەبن.
زێدەتر گوت، ئەڤ سالە یاریێن ئاگری یێن هەرە جوان و مەزن ل ئاکرێ دێ هێنە بلندکرن، بەلێ ل سەرێ گری نە، بەلکو دناڤبەرا هەردوو کەلها، ژبەرکو سەرێ گری دێ بۆ مێهڤانان هێتە تەرخانکرن، دیسان دێ 2724 خەتیر لدیڤ هژمارا سالا کوردی هێنە برن بو سەر کەلا ئاکرێ و کەلە کەڤنێ و جهێن دی.
ناڤبری دیارکر ژی کو هژمارەکا لژنان هاتنیە دانان بو رێکخستنا ئاهەنگێ و دوڤچون ل سەر سەرپێچیێن ترافیک و تەقە و تێکدانا دارستان و ژینگەهێ و تاوانا و گوتژی، یاریێن ئاگری و خەتیر دێ پشتی فتاێ هێنەکرن، دێ چەندین خارنگەهێن گەڕوک ژی بو فتارێ دێ هێنە دانان و پشتی یاریێن ئاگری ژی دێ هەموو خارنگەهـ د ڤەکری بن، دێ هەلدەین کو خارن بێ بەرامبەر ژی ل هندەک جها بدانین، رێۆرسم ژلایێ کومپانیا MRF دێ ب جوانی هێتە ریکخستن وەکو سپونسەر و چەندین سوپرایز دێ هەبن بۆ بەرهەڤبویان و ئەو دێ ل دەمێ ئاهەنگێ دیاربن.
ئاکرێ سالانە ب رەنگەکێ جودا نەورۆزێ دکەت و ب پایتەخێ نەورۆزێ دهێتە نیاسین، سالانە پتری 100 بو 200 هزار کەس بەرهەڤ دبن.