20 هەزار دۆنم پووش و پاوان سووتا

 

 

لەماوەی  دوو رۆژی رابردوودا ئاگرێکی فراوان لەسنووری گوندەکانی چەمی رەزان کەوتەوە و بەو هۆکارەش رووبەرێکی زۆر لە پووش و پاوان و داری سروشتی و رەز و باخی هاووڵاتیان سووتا و زیانی زۆریان پێگەیشت.

 

عەقیدی پۆلیس هێمن کەمەرخان ئەفەندی  بەڕێوەبەری راگەیاندنی بەڕێوەبەرایەتی پۆلیسی دارستان و ژینگەی پارێزگای سلێمانی رایگەیاند لەماوەی دوو رۆژی ڕابردوودا بەشێک لە پووش و پاوانی گوندی "قۆچەبلاغ"  ئاگری گرتووە و دواتر لە لایەن پۆلیسی بەرگری شارستانی کۆنترۆڵ کراوە و بەو هۆیەش ٥٠٠ دۆنم لە زەوییەکان سووتاون.

 

دواتر لە سنووری گوندی شێخ زەینەڵ ئاگرێکی تر سەری هەڵداوە و بەهۆی بوونی بایەکی بەهێز ئاگرەکە تەشەنەی کردووە بۆ گوندەکانی "بیران ، قۆچبلاغ ، دەرەنار ،سیکانیان و چەند گوندێکی تر و بەهۆی فراوانی ڕووبەری ئاگرەکە، دوای ١٥ سەعات ئاگرەکە کۆنترۆڵ کراوە.

 

بە گوتەی پۆلیس سەرووی 20 هەزار دۆنم لە پووش و پاوان و داری سروشتی سووتاون و زیانێکی زۆر بەر سروشتی ناوچەکە کەوتوە و چەندین ئاژەڵ و باڵندەی کێوی زیانیان پێگەیشتووە .

 

بەپێی بەدواداچوونەکان دەرکەوتووە هۆکاری ئاگرکەوتنەوەکان بەهۆی پابەندنەبوونی هاوڵاتیان و پاشماوەی بەجێماوی گەشتیاران بووە.

 

 

 

 

 

 

 



وشە - سلێمان تاشان


PM:01:50:17/07/2017




ئه‌م بابه‌ته 844 جار خوێنراوه‌ته‌وه‌‌