لە ڕوونكردنەوەیەكی وەزارەتی گواستنەوە و گەیاندنی حكوومەتی هەرێمی كوردستان بۆ بەشێك لەو میدیاكارانەی لە تۆڕەكانی كۆمەڵایەتی هەواڵی ئەوەیان بڵاو دەكردەوە وەزارەتی گواستنەوە و گەیاندن 32 هەزار فەرمانبەری لەسەر هێلی شەمەندەفەر هەیە دەڵێت دوورە لە ڕاستی و سەرجەم وەزارەتەكە نزیكەی پێنج هەزار فەرمانبەری هەیە.
ئەمڕۆ پێنجشەم 11ـی كانوونی دووەم، لە ڕوونكردنەوەیەكی وەزارەتی گواستنەوە و گەیاندنی حكوومەتی هەرێمی كوردستان كە وێنەیەكی بۆ "وشە" نێردراوە تیایدا هاتووە، ماوەی چەند رۆژێكە لە تۆڕەكانی كۆمەڵایەتی دەنگۆ و هەواڵێكی هەڵبەستراو لەبارەی ژمارەی فەرمانبەر و كارمەندانی گوایە (هێڵی شەمەندەفەر) لە هەرێمی كوردستان بڵاوكراوەتەوە لە هەرێمی كوردستان و لە وەزارەتی گواستنەوە و گەیاندن هیچ بەڕێوەبەرایەتیەك و بەشێك نییە بەناوی هێڵی شەمەندەفەر ، ئەوەی هەیە بەڕێوەبەرایەتی گشتی گواستنەوەی زەمینی و هێڵی ئاسنی و تراموایە و كۆی میلاكاتییان بە هەموو پارێزگا و ئیدارە سەربەخۆكان (748) كارمەندە.
لەبەشێكی ڕوونكردنەوە هاتووە، خستنەڕووی ئەو ژمارە زۆرەی فەرمانبەران دوورە لە راستی و وەزارەتی گواستنەوە و گەیاندن رێژەی میلاكاتی بە دیوانی وەزارەت و هەموو بەڕێوەبەرایەتیە گشتییەكانی بە هەردوو فڕۆكەخانەی نێودەوڵەتی هەولێر و سلێمانیشەوە تەنها پێنج هەزار و 481 فەرمانبەرە بە هەمیشەیی و گرێبەستەكانەوە و لە داتاكانیش ئەو رێژەیە تۆماركراوە.
وەزارەتی گواستنەوە و گەیاندن لەكۆتایی ڕوونكردنەوەكەی دەڵێت، بۆیە كۆی ئەو دەنگۆیە هیچ راستیەكی تێدا نییە و هەڵبەستراون و لەلایەن خۆشمانەوە لە وەزارەتی گواستنەوە و گەیاندن، هەمیشە دەرگەمان ئاوەڵایە بۆ خستنەڕووی داتاو زانیارییەكان و ئامادەین بیانخەینەڕوو.
ماوەی چەند ڕۆژێك لە هەرێمی كوردستان دەنگۆی بوونی ژمارەیەكی زۆر لە فەرمانبەر بەناوی هێلی شەمەندەفەر تۆمار كراوە و مووچە وەردەگرن بڵاو دەكرایەوە لە تۆڕەكانی كۆمەڵایەتی.
رامیتر