زۆرێك لە ئێمە كاتێك وێنەیەكی سەرنج ڕاكێش و جوانی سروشتی كوردستان یان وێنەیەكی كاریگەر دەبینین هەرگیز نەمان پرسیوە وێنەگرەكە كێیە، وێنەگرانی خاوەن وێنە جوانەكان بە سەربازی ون دەزانرێت و هەندێك وێنەش هەیە لە وڵاتان بووەتە هێما.
فەیسەڵ حەسەن قادر یەكێكە لە وێنەگرە كۆنەكانی شاری هەولێر بە گوتەی خۆی چوارەمین كۆنترین وێنەگری شاری هەولێرە، ماوەی 37 ساڵە كاری كڕین و فرۆشتن و چاكردنەوەوەی كامیرا دەكات.
فەیسەڵ بۆ "وشە" دەڵێت، سەرەتا لە كاری كڕین و فرۆشتنەوە دەستم پێكرد، ئەو كات ئەو جۆرە كامێرایانە هەبوو وەك (كۆداك و پۆڵۆرایت و كیس و زینەت و رێڤلێكس) ئەو كامێرایانە وەك ئەوانەی ئێستە نەبوو راستەوخۆ وێنەكە بگرێ كار پی كردنی گران بوو ئەو كەسەی بەكاری دەهێنا دەبوایە باش شارەزابێت.
وێنەگرەكە ئاشكرای دەكات جگە لە كڕین و فرۆشتنی كامێرا كڕین فڕۆشتنی رادیۆش دەكەم وە كامێرای ڤیدیۆش مامەڵەی پێوە دەكەم، هەروەها هونەری فۆتۆگرافیش ئارەزوو دەكەم.
"شێوازەكانی وێنەگرتن لە هەموویان كارم كردووە وەك وێنەی كەسی و وێنەی مایكرۆ و وێنەی سروشتی كار لە هەموو شێوازەكانی وێنە كردووە و بە هەزارەها كامێرام گۆریوە ئەمەش بۆ ئەوە دەگەرێتەوە كە من كاری كرین و فرۆشتنی كامێراش دەكەم" وێنەگرەكە وای گوت.
فەیسەڵ 23 پێشانگەی كردووەتەوە لە هەموو جۆرەكانی وێنەگرتن وەك سروشتی و كەسی و فەلەكی و لە چەندان پێشانگە بەشداری كردووە.
یەكێك لە وێنەكانی فەیسەڵ وێنەی پیاوە هەژارەكەییە كە لە بەشێكی زۆری سەندیكا و ڕێكخراوەكان وەك هێما بۆ بەرگری لە هەژاران بەكار هاتووە.
هەولێر/ عەبدوڵا مەرزانی