لە سنووری شارەدێی هەریری سەر بە شارۆكەی شەقڵاوە لە لایەن كەسانی نەناسراوەوە گۆڕی پیاوچاكێكی ناوچەكە هەڵدەدەنەوە كە مێژووەكەی بۆ پێش چەند سەتەیەك دەگەڕێتەوە، بەرپرسی كارگێڕی ناوچەكەیش هۆكارەكانی ئەو حاڵەتە ئاشكرا دەكات.
ماوەیەكە لە شار و شارۆكەكانی كوردستان، خەلكانێكی نەناسراو لە گۆڕی شێخ و پیاوچاك و ناوچە شوێنەوارییەكان دەكۆڵنەوە و لایەنە پێوەندیدارەكانیش نازانن ئەوان چ دەستكەوتێكیان لە هەڵدانەوەی گۆڕەكان هەبووە، بەپێی ئەو زانیاریەی دەست "وشە" كەوتووە، لە هەریەك لە ناوچەی تۆبزاوە، دەشتی هێرت، موسەكاوە، دیانا، سۆران، دەشتی هەریر لە سنووری پارێزگەی هەولێر گۆڕ و ناوچەكان هەڵدراونەتەوە.
زاهیر بناوی، سەرۆكی شارەوانی هەریر ئەمڕۆ چوارشەم بە "وشە"ی راگەیاند، كەسانێكی نەناسراو بە شەو هەڵیان كوتاوەتە سەر گۆڕی "شێخ مەحموود" لە شارەدێی هەریر، توانیویانە لە گۆڕەكە بكۆڵنەوە و زانیاریمان نییە هیچ كەلوپەلێك و شتێكی گرانبەهایان دۆزیبێتەوە.
سەرۆكی شارەوانی هەریر دەڵێت، "ئەوانەی ئەو كارەیان كردووە دڵنیاین خەڵكی دەڤەرەكە نین، چونكە ئەوان بە چاوی رێزەوە لەو گۆڕە دەڕوانن و رێزی زۆری لێ دەگرن و ئەو پیاوچاكەیان خۆش دەوێ، دووپاتی كردەوە، هەڵدانەوەی گۆڕی پیاوچاكەكە بۆ دوو ئەگەر دەگەرێتەوە كە هەردوو ئەگەرەكە بۆ تێكدانی شارستانیەت و مێژوو و كولتووری كوردستانە.
زیاتر گوتی، "ئەگەری زۆر هەیە، ئەو كارە لەلایەن گرووپێكی ئیسلامی توندڕۆ كرابێت، چونكە هەبوونی گۆڕی شێخ و پیاوچاكانی كوردستانیان پێ بیدعە و زیادكراوی دینە و هەوڵی تێكدان و لە ناوبردنی دەدەن، هەر وەك لە رابردوو گرووپی جندولئیسلام چەندین كاری هاوشێوەی كرد، ئەو گڕووپە توندڕۆیانە باوەڕیان بە هەبوونی پیاوچاك هەیە، بەڵام باوەڕیان بە پیاوچاك و شێخی كوردستان نییە و دەیانەوێ هەموو پیرۆزییەكانی كوردستان لەلایەن خەڵكەوە بێ رێز بكەن و نیازیانە خەڵك بە چاوی سووك لەو پیرۆزیانە بڕوانێ كە بێگومان ئەوە دەستێكی لە پشتە، ئەگەرنا ئەوان رێزی زۆر لە پیاوچاكە بیانییەكانی وەكو حەسەن بەنا و سەید قوتب دادەنێن و هەموو هەوڵێك دەدەن تا بیر و هۆشی خەڵكی كوردستان بۆ شێخ و مەشایەخی وڵاتانی عەرەبی رابكێشن.
بە گوتەی ئەو بەرپرسەی هەریر، ئەگەری دووەم گەڕان بە دووای شتی گرانبەها وەكو زێڕ و زیو و كەلوپەلە شوێنەوارییەكانە، هەردوو ئەگەرەكەیش بۆ تێكدان و لەناوبردنی شارستانیەتی كوردستانە كە پێی دەستێكی هەواڵگری دەرەكی ئەنجام دەدرێت و دەیانەوێ تەناهی كوردستان بشێوێنن و مێژووی كوردستان تێكبدەن.
شێخ مەحموود پیاوچاجێكی دەشتی هەریرە، چەند سەتەیەكە گۆڕەكەی لە نزیك گوندی فلوونە لە رۆژئاوای شارەدێی هەریرە و خەڵكی دەڤەرەكە بە پیرۆزی لێی دەڕوانن، هاووڵاتییان و كۆچەر و رەوەندییەكان كەلوپەلی خۆیان تا شتە گرانبەهاكانیان لەسەر دادەنا و بە پارێزراوی دەمایەوە، هاوكات هاووڵاتییان بەتایبەت ئافرەتان بە مەبەستی مناڵبوون و چارەسەری كێشە و گرفتەكانی هاوسەرگیری دەچنە سەر گۆڕی و لە رێگەی ئەو پیاوچاكە لە خودا داوای گیرابوونی نزاكانیان دەكەن و لای خەڵكی دەڤەرەكە "شێخ مەحموود"، یەكێكە لە پیاوە هەرە چاكەكان".
بەپێی ئەو زانیارییانەی لە پۆلیسی هەریر دەست "وشە"كەوتووە، هیچ كەسێك لەسەر هەڵدانەوەی گۆڕی شێخەكەی هەریر سكاڵای نەبووە، بەو پێیەی گۆڕەكە كۆنە و هیچ كەسوكارێكی لە ناوچەكە نەماوە تا سكاڵا تۆمار بكات و لایەنە پێوەندیدارەكانیش بە فەرمی سكاڵایان لەسەر كەس تۆمار نەكردووە.
شارەدێی هەریر لە رووی كارگێڕییەوە سەر بە شارۆكەی شەقڵاوەیە، رووبەری جوگرافیای 560 كم دووجایە و نزیكەی 100 گوندی هەیە و دەشتی هەیر یەكێك لە دەشتە بە ناوبانگەكانی كوردستان.
هەریر/ موڕشید برادۆستی