نووری بێخاڵی
وێدەچێ هەندێ پەرلەمانتێری كوردستان هێشتا نەشئەی لایكی فەیسبووك و هەلەكەسەمای عەوام بەری نەدابن، بۆیە ئاوا بە بۆنە و بەبێ بۆنە، ناوە ناوە دێن و بە هەندێ قسەی سەمەرە و وڕێنەی دووبارە، سەرنجی خۆشباوەڕان بۆ خۆیان كێش دەكەن!
ئەو پەرلەمانتێرانە ئەگەر مەلەی ناو گۆمی لێڵی ململانێی سەقەت و ناكۆكی سیاسیی ناشەریفانە نەبووایە، ڕەنگە لە خەونیشیاندا نەگەیشتبان بەو پۆستە. هەنووكەش وێدەچێ سووێیان بۆ مووچەی چەوری بێ دەوامی پەرلەمانتێرییەكەیان بێتەوە، بۆیە ئاوا بەم دوایی دواییانەی كۆتای تەمەنی پەرلەمانتێریان، بە چەپ و ڕاستدا دەیكوتن!
پێڕە چوار كەسییەكەی پەرلەمان (كە تەنیا خوا خاڵی هاوبەشی نێوانیانە) لەو كائینە عەجیبانەن كە باوەڕ ناكرێ تا ئێستە، هیچ پەرلەمانێكی دنیا، سەمەرەی وەك ئەوانی بە خۆیەوە بینیبێت.
ئەو پێڕە كە هێندەی لە یاریزانی سێرك دەكەن، لەوە ناكەن نوێنەری خەڵك بن. جار جارە و لە پڕ، كاتێ بازاڕی دەركەوتن و نمایشی سێرك ئاسای ناو خەڵكیان نامێنێ، دێن و سەری زێرابێك هەڵ دەدەنەوە و (تەڕك!)ێك بە پیساییدا دەدەن!
ئەو پێڕە پەرلەمانتێرە كە لە ڕاستیدا زێدەتر بەری چەلەحانێ، تۆمەت بەشینەوە، فڕێدانی قسە، لێدانی ڕەمڵ و ڕەقەم لە خۆوە، بانێكە و دووهەوای هەڵوێست لە ئاست دیاردە و دەركەوتە و ڕووداوەكانی كوردستان دەخۆن. نە شەرم لەوە دەكەن درۆ بە هەڵوێست بە خەڵك بفرۆشنەوە، نە باكیشیان بەوەیە درۆكانیان لێ سپی بێتەوە. گرنگ ئەوەیە ماوە ماوە بێنەوە سەر زاران.
دەی، پەرلەمانێك كە هەر بە دەستی ئەنقەست و بۆ موزایەدەی سیاسی، هاوكات بە ئامانجی لێدانی هەرچی شكۆ و بەهای دامەزراوەكان هەیە، كرایە سەكۆی هەرزەگۆ، منداڵكار، هەرزە سیاسی، بازاڕی هەرزانفرۆشكردنی هەڵوێست و فڕێدانی قسە. هاوكات لە غیابی ئەو شتەی پێی دەگوترێ دادگا و داواكاری گشتی، بە سوودوەرگرتن لە پرەنسیپی قۆڕی پارێزبەندی پەرلەمانی، بە كاوێژكردن لەسەر میراتی فریوعەوامی. هەر ئەوە لەو پەرلەمانە چاوەڕێ دەكرێ، پەرلەمانتێرەكانی ئاوا بێباك و بێشەرمانە لە گاڵتەكردن بە میزاجی گشتی، بەردەوام دەبن!
ئەو پێڕە كە هێشتا غوسڵی شوورەیی و شەرمەزاریی سواڵنامە بێ سەر و بەرەكەیان بۆ یەكێتیی ئەوروپا لە خۆیان دەرنەكردووە، هەر لەگەڵ گەیشتنەوەیشیان بە كوردستان. بۆ ئەوەی كەتنی نەخوێندەواریی سواڵنامەكەیان لە بیری خەڵك ببەنەوە. پشووێكی كورت و وەك عادەتی هەمیشەیییان، ڕێك هاتنەوە و لەسەر شاشەكان بە لێدانی ڕەمڵ و ڕەقەم (وەك ئەو كابرایەی لە كانیی سەرەڕێی گوند ڕیت)، بازاڕی لایكی فەیسبووك و هەلەكەسەمای عەوامی خۆشخەیاڵییان بۆ خۆیان گەرم كردەوە.
شێركۆ جەودەت كە كاتی خۆی وەك بەرزەكی بانان لەژێر باری كەتنی دزەپێكردنی زانیاریی كۆبوونەوەكانی لیژنەی نەوت و گازی كوردستانی بۆ بەغدا و ئەملا و ئەولا، بۆی دەرچوو (دوور نییە لێ نەپرسینەوە و چاوپۆشی لێكردنیشی لە سای هەلومەرجی ململانێی حزبی ئەوكات، هەر لە بنەڕەتدا سەفقەیەكی حزبی و سیاسی بووبێت!). هەنووكە بێباكانەتر، بە قەوانێكی تر هاتووەتەوە و بەبێ ئەوەی بوێری و جوامێریی ئەوەی هەبێت ناوی بەرپرسەكە بڵێ. بەبێ ئەوەی بە دیقەت و جەودەتەوە بەڵگە و دۆكیۆمێنتێك بخاتە ڕوو. بەبێ ئەوەی باكی بە گاڵتەكردن بە هەستی خەڵك بێت، بەبێ ئەوەی حیسابی پووشێك بۆ ئەگەری كاردانەوەی داواكاری گشتی و دادگا بكات، یێژێ: "بەرپرسێكی كورد لە ئەڵمانیا ٣٦٠ شوقەی نایابی بە بەهای ١٨٠ ملیۆن دۆلار كڕیوە".
گوایە یەكێكی تری هاوكوفی ئەویش (ئەها ئەوەی دەڵێن: مەنجەڵ بۆ سەرقاپی خۆی دەگەڕێت)، نزیك لەو ڕەمڵ و ڕەقەملێدانەی شێركۆ، گوتوویەتی: "بەرپرس هەیە لەم كوردستانە، سێ تڕێلە دۆلاری (تەبعەن بە ڕێگەی حیسابی بانكی، یان بەڕێگەكانی سپیكردنەوەی پارە نا، بەڵكو هەر بە عەنتەری و بە سواری پشتی تڕێلە) بە سنوورەكاندا گەیاندووەتە ئەوروپا".
كاتی خۆی یاد و یادگاری بە خێر، ناسیاوێكمان هەبوو زۆر سەرناس بوو، هەر سەری قسەت دابەستایە، دەیزانی ڕاست دەكەیت، یان درۆیە و حەشووی تێدایە. ئیتر هێند لە ڕووش بوو، باكی بەوە نەبوو كاردانەوەی كابرای قسەكەر كە درۆ دەكات چی دەبێت. ئینجا لە سپیكردنەوەی درۆی بەرامبەریشدا، هێند خۆش، بە گفت و لفتێكی شیرین دەیگوت: "وەی لە قوڕێت نێن. خوایە بەشم لەو درۆیەیدا نەبێت".
ئێستە ئەو دوو پەرلەمانتێرە كە هەردووكیان گوایە سەریان بچێ، نوێژیان ناچێ. هەڵە نەبم لەگەڵ یەك دوو لە سەرقاپ و هاوكوفەكانیشیان كاتی خۆی بە جەماعی عەمرەیان كردووە، ئێ نزیكە رەمەزانیشە. جا بۆیە ئەگەر ڕاست دەكەن، قسەكەیان درۆ و حەشووی تێدا نییە، بۆ بازاڕگەرمی سیاسی و موزایەدەی حزبی نییە، با بەشی ئەوە جوامێری و بوێری بنوێنن، مەرد و مەردانە، ناوی ئەو بەرپرسانە بڵێن و بەڵگەكانیان بخەنە ڕوو. خۆ ئەگەر درۆش دەكەن، ئەوا هەتا مانگی ڕەمەزان نەهاتووە (ئێ مەعقوولە نوێژ بكەیت و عەمرە و تەوافت كردبێ، بە ڕۆژووش نەبیت؟)، كەفارەت و فیدیەی درۆكەیان بدەن، نەبا وەك كابرای (مازووكەری كون لە پاشۆلێ)، ڕۆژووی ڕەمەزانیشیان ڕەنج بە خەساری بێت!
ئەوەی لەو نێوەدا گرنگە، دانی فیدیە و كەفارەتی درۆ و بوختانەكانیان نییە كە رەنگە بۆ سەلامەتی ئاین و ئیمانیان خراپ نەبێت، بەڵكو شتی هەرە گرنگ ئەوەیە، ئەگەر بە ڕاستی داواكاری گشتی لەم وڵاتە هەیە، دەبێ دۆسیەیان بۆ بكاتەوە و ڕووبەڕووی یاسا و دادگایان بكاتەوە. بە قسەی ناسیاوی گۆرینیشمان ڕازی نەبێت و تەنیا پێیان بڵێ "وەی لە قوڕێتان نێین. خودایە بەشمان لەو درۆیەتان نەبێت".