گەشتوگوزاری كفری هەلی كار دەڕەخسێنێ
بەڕێوەبەرایەتیی گەشتوگوزاری شارۆكەی كفری لە سنووری كارگێڕیی گەرمیان، هەلێكی بەرچاوی دامەزراندن بۆ كوڕان و كچان دەرەخسێنێ، بەڕێوەبەری بەڕێوەبەرایەتییەكەش دەڵێ: مەبەستمانە خزمەت بە گەنجان بكەین و گرنگی ناوچەكە لە رووی شوێنەوار و گەشتوگوزارەوە بپارێزین.

حەمدیە مەنسوور بەڕێوەبەری بەڕێوەبەرایەتیی گەشتوگوزاری كفری، بە "وشە"ی راگەیاند: بۆیە هەنگاو دەنێین لە رووی كولتوورییەوە بەهاكەی بپارێزین، بۆ ئەوەش دەستمان كردووە بە رەخساندنی هەلی كار بۆ كوڕان و كچانی شارۆكەكەمان، بە تایبەت ئەوانەی كە بەهرەیان هەیە و دەتوانن ڕۆڵیان هەبێ لە پاراستنی كولتووری ناوچەكە.

زیاتر گوتی: جگە لە بوار ڕەخساندن بۆ كەسانی بەهرەدار  لە بوارەكانی: وێنەكێشان و شیعر و هەر بوارێكی تر، هەلیش دەڕەخسێنین بۆ ئەو كەسانەی بیانەوێت لە سنووری گەشتوگوزاری كفری بەكاری دەستی بۆ نموونە دوورینی جلی كوردی یان دروستكردنی خواردنی كوردەوای كار بكەن، بۆ فێستیڤاڵەكانی تایبەت بە گەشتوگوزار و چالاكییەكانی تایبەت بە گەشتوگوزار خزمەت بكەن، سەرەتا بەشێوەی گرێبەست و پاشتر هەوڵی دامەزراندنیان دەدەین بەشێوەی هەمیشەیی.

مەنسوور ئاماژەی دا، ژمارەی ئەوانەی داوای كار بۆ ئەو هەلی كارە دەكەن لە 100 كەسیش تێپەڕ بكات ئاسایییە، دەمانەوێت لە رێگەی هەلی كارەوە، سوود لە تواناكانی كوڕان و كچان وەربگرین، لەگەڵیشدا بەپێی توانای خۆمان هاوكاری مادی دەكەین.

دووپاتی كردەوە، لەم هەنگاوەمان بڕوانامە ناكەین بە پێوەری سەرەكی، بەتایبەت بۆ كەسانێك كە شارەزا بن لە بواری كاری راگەیاندن.

شارۆكەی كفری بەیەكێك لە شارۆكە دێرینەكانی كوردستان دێتە ئەژمار و مێژووی بە شارۆكەبوونی بۆ زیاتر لە نیو سەدە پێش ئێستە دەگەڕێتەوە و بەناوچەیەكی دەوڵەمەند بە شوێنەوار و گەشتوگوزار دێتە ئەژمار.

وشە/ گەرمیان، سەبری هۆرینی
پێداچوونە: ك.ش


PM:02:45:09/10/2016




ئه‌م بابه‌ته 3314 جار خوێنراوه‌ته‌وه‌‌

زیاتر ...