فڕۆكه‌كانی ئیسرائیل له ئاسمانی دیمه‌شق، باره‌گای سه‌ره‌كیی بزووتنه‌وه‌ی جیهادی ئیسلامی له‌و شاره‌یان كرده ئامانج و پێشبینی ده‌كرێت ژماره‌یه‌ك له فه‌رمانده و كادری ئه‌و بزووتنه‌وه‌یه كوژرابن.
هه‌واڵه‌كه له‌لایه‌ن میدیاكانی ئیسرائیل بڵاو كراوه‌ته‌وه و ئاژانسی سانای سووریاش پشتڕاستی كردووه‌ته‌وه و گوتوویه‌تی، باڵه‌خانه‌كه هی بزووتنه‌وه‌ی جیهادی ئیسلامییه.
كه‌ناڵی 12ی ئیسرائیل ده‌ڵێت، ئه‌وانه‌ی له‌و باره‌گایه كۆ بووبوونه‌وه، پلانیان هه‌بووه له سنووری جۆلانه‌وه هێزه‌كانی ئیسرائیل بكه‌نه ئامانج. وه‌زیری به‌رگریی ئیسرائیل گوتوویه‌تی، هه‌رگیز رێگه ناده‌ن سووریا ببێته مه‌ترسی بۆ سه‌ر ئیسرائیل.
پێویسته بگوترێ هێشتا به وردی دیار نییه چه‌ند كه‌س به‌هۆی ئه‌و هێرشه كوژراون، به‌ڵام هه‌ندێك سه‌رچاوه باس له كوژرانی فه‌رمانده‌ی بزووتنه‌وه‌كه له دیمه‌شق ده‌كه‌ن.
ئیسرائیل ناوه‌ناوه هێرشی ئاسمانی له سووریا ئه‌نجام داوه و له‌وه‌ته‌ی هه‌شتی كانوونی یه‌كه‌می ساڵی رابردووه‌وه كه حكوومه‌تی به‌شار ئه‌سه‌د رووخاوه، هێرشه‌كانی زۆر چڕتر كردووه‌ته‌وه و زیانی به جبه‌خانه‌ی سه‌ربازی گه‌یاندووه، ترسی ئه‌وه‌ی هه‌یه ئه‌و چه‌ك و ته‌قه‌مه‌نییانه له‌لایه‌ن گرووپه توندڕه‌وه‌كانه‌وه له دژی ئیسرائیل به‌كار بهێنرێن.