نیویۆرك تایمز: 274 خزمەتكاری كینی كە زۆرینەیان ژنن لە سعوودیە كوژراون

:: PM:01:34:17/03/2025 ‌
سعوودیە بووەتە دۆزەخی كرێكارانی بیانی و بەپێی راپۆرتێكی نیویۆرك تایمز،  ژنانی كینیا و فلیپین و چەندانی وڵاتی تر، وەك كۆیلە مامەڵەیان لەگەڵ دەكرێت و بەشێكیشیان شوێنبزر دەكرێن.

بەپێی راپۆرتێكی مەیدانیی رۆژنامەی نیویۆرك تایمزی ئەمەریكی، لە ماوەی پێنج ساڵی رابردوودا بە لایەنی كەمەوە 274 خزمەتكاری كینی كە زۆربەیان ژنن لە سعوودیە گیانیان لە دەست داوە، تەنیا لە ساڵی رابردوودا 55 كینی لە سعوودیە گیانیان لە دەست داوە.

بەپێی راپۆرتی رۆژنامەكە، زۆرینەی ئەو مردنانە بە مردنی سروشتی لەلایەن حكوومەتی سعوودیەوە تۆمار دەكرێن، بەڵام دوای بەدواداچوون دەردەكەوێت كوژراون و شوێنەواری لێدان و سووتان بە جەستەیانەوە دیارە.

بەشێكیش لەو خزمەتكارانەی لەو وڵاتانەوە دەچنە سعوودیە، پاسپۆرتەكانیان لێ وەردەگیرێت و ئیتر هیچ رێوشوێنێكی یاساییان نییە و كاتێكیش رووبەڕووی دەستدرێژی دەبنەوە، حكوومەت یارمەتییان نادات.

لێكۆڵینەوەیەكی نیویۆرك تایمز دەریخستووە، بەشێكی زۆری بەرپرسانی كینیا و ئەو وڵاتانەی خزمەتكار بۆ سعوودیە دابین دەكەن، كۆمپانیایان هەیە و بازرگانی بەژنانی وڵاتەكەیانەوە دەكەن و دەیانێرنە سعوودیە و ئیمارات و كوێت تا كار بكەن، بەڵام ئەو بەرپرسانە  دەزانن ئەو كرێكارانەی دەیانێرن تووشی چ دۆزەخێك دەبنەوە.

وڵاتانی عەرەبی ئیسلامی وەك قەتەر، سعوودیە، كوێت و ئیمارات، بەهۆی نەوتەوە بوونەتە خاوەن سەرمایەیەكی زۆر، بەڵام لە رووی ئازادی و مافی مرۆڤەوە وێرانن، بەشێك لەم وڵاتانە بەهۆی پارەوە رێكخراو و راگەیاندنەكانی دنیاشیان بێدەنگ كردووە تا كێشەی وڵاتەكەیان نەگوازرێتەوە بۆ رای گشتی دنیا.



وشە - سۆران عەزیز