زنجیرەیەك هێرشی تری ئەمەریكا بۆ سەر یەمەن و بە تایبەتی شاری سەنعای كردە ئامانج كە مۆڵگەی حووسییەكانی لێیە.
ئەمشەو هەینی، 28ی ئادار، سەرچاوە هەواڵییەكانی یەمەن بڵاویان كردەوە كە پێنج شوێن لە شاری سەنعا لە ڕێگەی فڕۆكەی جەنگییەوە كراونەتە ئامانج.
سەرچاوەی تری هەواڵییش ئەوەیان پشتڕاست كردووەتەوە كە هێرشەكە لەلایەن هێزی ئاسمانیی ئەمەریكییەوە بووە و یەكێكیان بارەگای سەرەكیی سەركردایەتیی پاسەوانی كۆماری لە باشووری سەنعا كردووەتە ئامانج كە حووسییەكانی لێیە.
ماوەی 14 ڕۆژە لەسەر یەك، هەموو شەوێ لەلایەن فڕۆكە جەنگییەكانی ئەمەریكاوە هێرش دەكرێتە سەر خاڵ و مۆڵگەی حووسییەكان لە یەمەن، پێشتر ئەو هێرشانە لایەن ئیسرائیلەوە دەكرانە سەریان، بەڵام لەوەتەی ترەمپ هاتووە، هێرشەكان هەمووی بەناوی ئەمەریكاوە دەكرێن.