پنتاگۆن لە ژێر ڕێنوێنیی ڕاستەوخۆی وەزیری بەرگریی ئەمەریكا، ناردنی فڕۆكەی جەنگی زیاتری بۆ ڕۆژهەڵاتی ناوەڕاست ڕاگەیاند، ئەمەش لە كاتێكدایە تا دێت گرژییەكان لەگەڵ ئێران زیاتر دەبن.
ئاژانسی ڕۆیتەرز لە زاری بەرپرسانی وەزارەتی بەرگریی ئەمەریكا "پنتاگۆن"، لەبارەی ناردنی هێزی ئاسمانی و فڕۆكەی جەنگیی زیاتر بۆ ڕۆژهەڵاتی ناوەڕاست، زانیاری نوێی بڵاو كردەوە.
ئاژانسەكە بڵاوی كردەوە، واشنتن شەش فڕۆكەی بۆمبڕێژكەری لە جۆری B-2ی گواستووەتەوە بۆ بنكەیەكی سەربازیی ئەمەریكا و بەریتانیا لە دوورگەی دیێگۆ غارسیا لە زەریای هیندستان.
دەشڵێن، فڕۆكەی بۆمبڕێژكەری B-2 یەكێكە لە پێشكەوتووترین فڕۆكەكانی ئەمەریكا، كە تەكنەلۆجیای پێشكەوتووی تێدایە، وای لێ دەكات دەتوانێت لە دوژمن بدات بەبێ ئەوەی لەلایەن ڕادارەوە دەستنیشان بكرێت.
باس لەوەش كراوە، توانای هەڵگرتنی بەهێزترین بۆمبی ئەمەریكی هەیە، لەوانەش چەكی ئەتۆمی، ئەمەش ئەگەری بە ئامانجگرتنی دامەزراوە سەربازییە ستراتیجییەكانی وەك شوێنە ئەتۆمییەكانی ئێران زیاتر دەكات.
ئەوەش خراوەتەڕوو، فەرماندەی ستراتیجی ئەمەریكا ڕەتی كردەوە ژمارەی وردی فڕۆكەكانی B-2 كە لەسەر دیێگۆ غارسیا جێگیر كراون ئاشكرا بكات. دووپاتیشی لەوە كردەوە، هیچ لێدوانێك لەسەر ئۆپراسیۆنەكان یان مەشقەكانی پێوەست بەم جۆرە فڕۆكەیە نادات.
ڕاپۆرتە سەربازییەكان ئاماژە بەوە دەكەن، واشنتن خۆی ئامادە دەكات بۆ كۆكردنەوەی هێزێكی زیاتر لە ناوچەكەدا، لەگەڵ ئەگەری جێگیركردنی دوو كەشتی فڕۆكە هەڵگری ئەمەریكی بۆ ڕۆژهەڵاتی ناوەڕاست بەم نزیكانە.
شۆن بارنێل گوتەبێژی وەزارەتی بەرگریی ئەمەریكا رای گەیاندووە، كەشتیی فڕۆكەهەڵگری تر لە جۆری هاردی ئێس ترومان دەنێرن بۆ رۆژهەڵاتی ناوەڕاست، لە پێناو بەهێزكردنی سەقامگیریی ناوچەكە و بەرپەرچدانەوەی هەر هێرشێك بكرێتەسەر بەرژەوەندییەكانیان و پارێزگاریكردن لە رێڕەوی بازرگانی و كەشتییە بازرگانییەكانیان لە ناوچەكەدا.
ئەم پێشهاتە لە كاتێكدایە، دۆناڵد ترەمپ سەرۆكی ئەمەریكا قسەكانی بەرانبەر بە ئێران پەرە پێداوە و هەڕەشەی بۆردمانی ئێران دەكات، ئەگەر ڕێككەوتنێكی نوێی ئەتۆمی لەگەڵ واشنتن نەكرێت.