وەك هاتە راگەیاندن بڕیارە لە چەند رۆژی داهاتوو محەمەد شیاع سوودانی سەرۆك وەزیرانی عێراق سێیەم سەردانی بۆ توركیا ئەنجام بدات، ئەو چاوی بە رەجەب تەیب ئەردۆغان سەرۆكی توركیا دەكەوێت، بڕیارە ئەوان باسی پێوەندییەكانی هەردوو وڵات لە بوارە جیاوازەكان، لەوانە ئابووری و ئاسایش بكەن.
ئەو سەردانەی سوودانی بۆ ئەنقەرە دەبێتە سێیەم دوای ئەوەی لە ئاداری 2024 و تشرینی دووەمی 2024 سەردانی ئەنقەرەی كرد، لەوكاتەی ئەردۆغان لە نیسانی 2024 سەردانی بەغدای كرد و 26 یاداشتی لێكگەیشتنیان واژوو كرد، لەوانە پێوەست بە پەكەكە و سنوورەكان و ئابووری و ئاو.
لەوكاتەی ماجید لەجماوی باڵوێزی عێراق لە ئەنقەرە لە باسی سەردانەكەی سوودانی رای گەیاند كە تیایدا باسی چەند دۆسیەیەك دەكرێت لەوانە رێگەی پەرەپێدان و وزە و بازرگانی وەبەرهێنان، جیا لە بەهێزكردنی هاریكاریی تەناهی، عەبدولقادر ئۆرالئۆغڵو وەزیری گواستنەوەی توركیا گوتی، هاوكات بڕیارە رەجەب تەئیب ئەردۆغان سەرۆكی توركیا لە نیوەی یەكەمی ئەمساڵ سەردانی بەغدا بكات.
هەر لەبارەی سەردانەكە
موختار مووسەوی ئەندامی لیژنەی پێوەندییەكانی دەرەوەی پەرلەمانی عێراق دەڵێت، لە چەند رۆژی داهاتوو سوودانی سەردانێكی گرنگ بۆ توركیا ئەنجام دەدات، رەنگە بكەوێتە ناوەڕاستی هەفتەی داهاتوو، تیایدا باسی چەند دۆسیەیەك دەكرێت، بەتایبەتی ئاسایش و ئابووری و بازرگانی، باسی دۆخی تەناهیی ناوچەكە دەكرێت لە دوای گۆڕانكارییەكان لە سووریا و كاریگەری لەسەر رۆژهەڵاتی ناوەڕاست، جیا لە كۆنترۆڵكردنی سنوورەكان و زیادكردنی هاوئاهەنگیی تەناهی و دۆسیەی پەكەكە و بوونی لەسەر خاكی عێراق، باسی پڕۆژەی رێگەی پەرەپێدان و پشكی ئاوی عێراق دەكرێت.