عێراق یەكێكە لە دەوڵەمەندترین وڵاتانی دنیا بە نەوت و یەدەگی نەوت و غاز، كەچی خەڵكەكەی بە دەست دەیان تەنگژەوە دەناڵێنن و نیوەی زیاتری بودجەكەی بۆ پڕكردنەوەی كورتهێنان و دانەوەی قەرز و سوودی قەرزەكان دەچێت، شارەزایان هۆكارەكەی بۆ گەندەڵیی هێزە سیاسییەكان و خراپیی ئیدارەدانیان بۆ حكوومەت و دەوڵەت دەگەڕێننەوە.
یەم دواییە میدیاكانی عێراق تیشكیان خستە سەر كارەساتێكی گەورە لە پارێزگەی زیقاڕ لە باشووری عێراق، ئەویش بە نەمانی ئاوی شیرین بۆ خواردنەوە و تەنانەت ئاو بۆ ئاودێری و كشتوكاڵ و ئاژەڵداریش، ئەوە وای كرد دانیشتووانی ناوچەكە لە توێنوێتی و نەخۆشییەكان و بێكاری هەڵبێن و كۆچ بكەن، وەك قایمقامی یەكێك لە شارۆكەكانی ئەو پارێزگایە دەڵێت، كەمی ئاو وای كردووە ژیان لێرە زۆر زەحمەت بێت و وای كردووە چەندان خێزان كۆچ بكەن.
كەریم حلو شارەزای ئابووری وریایی لە دۆخەكە دەدات و دەڵێت، لە سەرەتای ئەمساڵەوە زیاتر لە 1500 خێزان بەهۆی كەمئاوییەوە ناچاری كۆچكردن بوونە لە زیقاڕ، زۆرینەی ئەو خێزانانە خەریكی كشتوكاڵ و ئاژەڵداری بوون، بەڵام لە دوای بێئومێدبوون بەرەو شارەكانی تری وەك ناسریە و بەسرە و بەغدا كۆچیان كرد، ئەوان بە دوای ئاو و هەلی كار دەگەڕێن.
روونی كردەوە، تەنگژەكە هەر ئەوەندە نییە زیان بە كشتوكاڵ و ئاژەڵداری كەوتووە، بگرە گەیشتووەتە پێكهاتەی كۆمەڵایەتیش، كاتێك بەهۆی كۆچكردنەوە پێوەندیی كۆمەڵایەتی لێك هەڵوەشاوەتەوە و گوشاریش خراوەتە سەر ئەو ناوچانەی كۆچیان بۆی كردووە، بۆیە بەردەوامبوونی دۆخەكە وا دەكات چەندان گوند و ناوچە بە تەواوەتی چۆڵ بكرێن، بەوەش هەڕەشەیەكی مەترسیداری دیمۆگرافی و ئابوورییە بۆ سەر ناوچەكە و كۆچ و رێژەی هەژاری و بێكاری زیاد دەكات.