لیژنەی هاوئاهەنگیی مانگرتنی مامۆستایانی عێراق رای گەیاند كە یەكشەمی داهاتوو مانگرتنە و پاشگەز نابنەوە، ئەوان چەند داواكارییەكیان هەیە و تا ئێستە سەندیكای مامۆستایان هەڵوێستی خۆی بەرانبەر بە مانگرتنەكە یەكلا نەكردووەتەوە.
عەلی رەحیم ئەندامی لیژنەكە دەڵێت، مەبەستی مانگرتنی مامۆستایان جێبەجێكردنی چەند داواكارییەكە، لەوانە حسێبكردنی یاسای راژەی پەروەردەیی بۆ مامۆستایان بە هاوشێوەی یاسای راژەی زانكۆیی، كە وەزارەتی خوێندنی باڵا كاری پێ دەكات و دەرماڵەی 100% بۆ وەزارەتەكە حسێب دەكرێت.
زیاتر دەڵێت، هەروەها زیادكردنی بڕی 100 هەزار بۆ باشكردنی ئاستی بژێوی و 150 هەزار دیناریش وەك دەرماڵەی پیشەیی و زیادكردنی دەرماڵەی گواستنەوە بۆ 100 هەزار دینار و زیادكردنی دەرماڵەی هاوسەرگیری بۆ 100 هەزار دینار و هی منداڵیش بۆ25 هەزار دینار.
لای خۆیەوە نافع زەلزەلی ئەمینداری رازگری سەندیكای مامۆستایانی عێراق رای گەیاند كە تا ئێستە وەك سەندیكا هەڵوێستیان بەرانبەر بە مانگرتنی مامۆستایان رانەگەیاندووە، یەكشەمی داهاتوو دەستەی كارگێڕیی سەندیكا كۆدەبێتەوە و هەڵوێستی رادەگەیەنێت.
لای خۆیەوە زولێخا ئەلیاس قەدۆ ئەندامی لیژنەی پەروەردە لە پەرلەمانی عێراق دووپاتی كردەوە كە پاڵپشتی لە داواكاریی مامۆستایان دەكەن بۆ باشكردنی ئاستی بژێوی و ژیانیان، بەڵام كاتی مانگرتنەكە گونجاو نییە، بەهۆی نزیكبوونەوەی تاقیكردنەوەی كۆتایی و مانگرتنەكە زیان بە قوتابیان دەگەیەنێت.