لە بەردەم ئامێرەكانی پارەدان خەڵك كۆ بوونەتەوە و دەیانەوێ ئەمڕۆ مووچەكانیان وەربگرن، بەڵام هێشتا نامەیان بۆ نەهاتووە، تیمی هەژماری منیش دەڵێت تا نامەت بۆ نەیەت، نابێت بچیتە بۆ وەرگرتنی مووچە.
ئەمڕۆ پێنجشەم 27ـی ئادار، تیمی هەژماری من، بە "وشە"ـی راگەیاند، لە مووچەی مانگی سێ لە تەواوی هەرێمی كوردستاندا، 313 هەزار مووچەخۆر مووچەكانیان لە رێگەی ئامێرەكانی ATM وەردەگرن.
زیاتر گوتی، هەر فەرمانبەرێك نامەی بۆ نەهاتبێت، با نەچێتە بەردەم ئامێرەكان، چونكە ناتوانێ مووچەكەی وەربگرێت، ئەو لیستەشی شەوی رابردوو بڵاو كراوەتەوە لیستی تەواوی فەرمانگەكان نەبوو، بەڵكو ئەمشەو لیستی تریش بڵاو دەكرێتەوە.
روونی كردەوە، لە رۆژانی جەژنیشدا فەرمانبەران لە ئامێرەكانی ATM مووچەكانیان وەردەگرن.
ئاماژە بەوەش كرد، ئامێرەكان لە دوێنێوە پڕ كراونەتەوە و رۆژانە لە كاتی مووچەشدا پڕ دەكرێنەوە، مووچەخۆران تەنیا دەبێت ئەوكاتە سەردانی ئامێرەكان بكەن كە نامەیان پێگەیشتووە و مووچەكەیان دابەزیوە، چونكە ئەگەر زووتر بچن پارەیان پێ نادرێت.
باسی ئەوەشی كرد، بۆ دروستنەبوونی قەرەباڵغی و لە پێناو دروستنەكردنی ئاستەنگ بۆ ئەوانەی نامەیان بۆ هاتووە بۆ وەرگرتنی مووچە، ئەوانەی نامەیان بۆ نەچووە، با نەچنە بەردەم ئامێرەكانی راكێشانی پارە.