بڕیارە ئەمڕۆ لە هەرێمی كوردستان لە چەند شوێنێك چاودێری بینینی مانگ بكرێت و یەكەم رۆژی جەژن دیاری بكرێت، سەنتەری فەلەكناسیی نێودەوڵەتیش بەیاننامەیەكی بڵاو كردەوە و تێیدا بەپێوەری فەلەكی، یەكەم ڕۆژی جەژنی ڕەمەزانی ئەمساڵی دیاری كرد.
ئەمڕۆ شەموو 29ـی ئادار، بڕیارە لە هەرێمی كوردستان لیژنەكانی بینینی مانگ لە چەند شوێنێك چاودێری بینینی مانگ بكەن و یەكەم رۆژی جەژن دیاری بكەن.
سەنتەری فەلكناسی نێودەوڵەتیش رای گەیاند، بینینی مانگی شەوال لە ئێوارەی ڕۆژی شەموو 29ی ئادار، لە وڵاتانی میسر، ئیمارات، سعوودیە و عێراق ئەستەمە، ئەمەش دەمانخاتە ئەو بڕیارەی كە ڕۆژی دووشەم ببێتە یەكەم ڕۆژی جەژنی ڕەمەزان.
وێڕای بەیاننامەی سەنتەری فەلەكناسی، ئێوارەی سبەی شەموو، لە هەموو وڵاتانی ئیسلامی دەست بە گەڕان بۆ بینینی مانگ دەكەن، بەڵام لەناویاندا ئەنجوومەنی فەتوای وڵاتی ئوسترالیا لە ئێستەوە بە پشتبەستوو بە زانست، ڕۆژی دووشەمی بۆ یەكەم ڕۆژی جەژنی ڕەمەزان دیاری كرد.
گوتەبێژی یەكێتیی زانایانی ئاینی ئیسلامیی كوردستان ڕای گەیاند، لە كوردستاندا تا سبەی ئێوارە هیچ بڕیارێك لەبارەی دیاریكردنی جەژنی ڕەمەزان نادرێت، بەڵام ئەمڕۆ ئێوارە لیژنەی بینینی مانگ لە هەرێمی كوردستان لە ڕێگەی لیژنە لاوەكییەكانیەوە لە پارێزگاكانی هەرێمی كوردستان، چاودێری مانگ دەكەن.
ساڵانە هەرێمی كوردستان بۆ جەژنەكانی ئاینی ئیسلام، پشت دەستەجەمعیی وڵاتانی ئیسلامی دەبەستێت و كاتێك ئەو وڵاتانە، بەتایبەتی سعوودیە بڕیار لەسەر جەژن دەدات، هەرێمی كوردستانیش لەگەڵ مسوڵمانانی دنیادا پابەند دەبێت.
بەپێی دەقە ئاینییەكان، مانگی رەمەزان و بەرۆژووبوون لە ساتی بینینی هیلالی مانگەكە دەست پێ دەكات و لە ساتی دەركەوتنی هیلالی مانگی شەوال كۆتایی دێت و رۆژانی سەرەتای ئەم مانگە دەبێتە جەژنی رەمەزان، كەچی ئێستە ئامرازەكانی فەلەكناسی و تەلەسكۆبەكان ئەوەندە پێشكەوتوون، زووتر پێشبینیی كاتی دروستبوون و دەركەوتنی هیلالەكە دەكەن.