بەڕێوەبەرایەتیی راگەیاندن و چاپ و بڵاوكردنەوەی سلێمانی، بە نووسراوێك رای گەیاند كە هەر میدیایەك رووماڵی كوشتن بكات، لێپێچینەوەی یاسایی لەگەڵ دەكەن.
ئەمڕۆ شەموو 29ـی ئادار، لە وەڵامی داواكارییەكەی داواكاری گشتی، چاپ و بڵاوكردنەوەی سلێمانی بە نووسراوێك سەرجەم میدیای بینراو، بیستراو، پۆرتاڵ و رایەڵە ئەلیكترۆنییەكان ئاگادار دەكاتەوە، خۆیان بەدوور بگرن لە بڵاوكردنەوە و رووماڵی هەواڵی تاوان بەتایبەتی تاوانی كوشتن و چاوپێكەوتن لەگەڵ كەسوكاری كوژراو و لێكدانەوە و شێوازی ئەنجامدانی تاوانەكە.
ئاماژە بەوەش كراوە، ئەوەی میدیاكان دەیكەن، پێچەوانەی یاسا و رێنوێنییە كارپێكراوەكانی هەرێمی كوردستانە، كاریگەریی دەروونیی خراپی دەبێت لەسەر تاكەكانی كۆمەڵگە و بەلاڕێدابردنی رەوتی لێكۆڵینەوەكان و زیانگەیاندن بە بەرژەوەندیی گشتی، بۆیە بڵاوكردنەوەی ئەم جۆرە هەواڵانە، پێچەوانەی مادەی سێیەم بڕگەی سێیەم لە رێنوێنیی رێكخستنی فریكیۆنسی سپەیس لە هەرێمی كوردستانە.
لە هەفتەی رابردوودا فەرمانگەی داواكاری گشتیی سلێمانی، لە نووسراوێكدا كە ئاراستەی بەڕێوەبەرایەتیی راگەیاندن و چاپ و بڵاوكردنەوەی سلێمانی، لەبارەی رووماڵكردنی هەواڵی كوشتن، هۆشداریی دەدات و دەڵێت، زۆر لە كەناڵەكان لە كاتی رووماڵی تاوانی كوشتن، زانیاری و هەواڵی نادروست بڵاو دەكەنەوە و پابەندی كاری ئیتیكی نابن، بۆیە داوا دەكەین میدیاكان پابەند بكرێن كە خۆیان بەدوور بگرن لەو جۆرە رووماڵانە، ئەگەر نا رێكاری یاساییان بەرانبەر دەگرنەبەر.