نێچیرڤان بارزانی: هیوادارم یەكڕیز و تەبا بتوانین باشتر خزمەتی گەل و نیشتیمان بكەین

:: PM:07:24:29/03/2025 ‌
نێچیرڤان بارزانی سەرۆكی هەرێمی كوردستان پەیامێكی بەبۆنەی جەژنی رەمەزان بڵاو كردەوە و رای گەیاند، ئەم جەژنە پیرۆزە، بۆنە و دەرفەتێكە‌ بۆ ئەوەی هەموومان پابەندیمان بە مانا و بەها و پەیامە باڵاكانی له پێكهاتنەوە، لێبوردەیی، ئاشتەوایی، لێكخۆشبوون و مرۆڤدۆستییەوە نوێ بكەینەوە.

سەرۆكی هەرێمی كوردستان دەڵێ‌، هیوادارم جەژن و بۆنەكانی داهاتوو، بۆ هەمووان لە دۆخ و ڕۆژگار و ژیان و گوزەرانێكی باشتردا بێنەوە و هەموومان پێكەوه لە هەرێمی كوردستان و عێراق‌، یەكڕیز و تەبا، بتوانین باشتر خزمەتی گەل و نیشتیمان بكەین.

دەقی پەیامی سەرۆکى هەرێمى کوردستان:
هاتنەوەی جەژنی پیرۆزی ڕەمەزان لە تەواوی موسڵمانان لە كوردستان، هەروەها لە عێراق و جیهان، بەتایبەتیش لە بنەماڵە و كەسوكاری سەربەرزی شەهیدان پیرۆز بێت. هیوادارم هەمووان جەژن و پشوویەكی ئارام و ئاسوودە و پڕ لە كامەرانی بەسەر بەرن و بە خێر و خۆشی بۆ هەموو لایەك بگەڕێتەوە.

ئەم جەژنە پیرۆزە، بۆنە و دەرفەتێكە‌ بۆ ئەوەی هەموومان پابەندیمان بە مانا و بەها و پەیامە باڵاكانی له پێكهاتنەوە، لێبوردەیی، ئاشتەوایی، لێكخۆشبوون و مرۆڤدۆستییەوە نوێ بكەینەوە، بە پێوەندییەكانماندا بچینەوە و لەسەر بنەمای ڕێز و خۆشەویستی، دۆستایەتی و هاریكاری، دایانبڕێژینەوە.

هیوادارم جەژن و بۆنەكانی داهاتوو، بۆ هەمووان لە دۆخ و ڕۆژگار و ژیان و گوزەرانێكی باشتردا بێنەوە و هەموومان پێكەوه لە هەرێمی كوردستان و عێراق‌، یەكڕیز و تەبا، بتوانین باشتر خزمەتی گەل و نیشتیمان بكەین.

جەژن لە هەمووان پیرۆز بێت، هەموو ساڵێك بە خۆشی.

نێچیرڤان بارزانی
سەرۆكی هەرێمی كوردستان


وشە - سه‌رخێڵ هاشم