پڕۆژەی رووناكی كە دابینکردنی کارەبای 24 سەعاتییە بۆ هاووڵاتییانی هەرێمی كوردستان، ئەو پڕۆژەیە ژێرخانی ئابووریی هەرێمی كوردستان بەهێزتر دەكات و بەهۆیەوە كوردستان لە هەموو بوارەكان و سێكتەرەكان دەبوژێتەوە. پڕۆژەکە كوردستان دەباتە قۆناغێكی نوێ لە گەشەكردن و پێشكەوتن و بەهێزیی كوردستان لە رووی دابینكردنی وزەی بەردەوام بۆ هاووڵاتییان و خاوەنكارەكان.
كاتێك هەرێمی كوردستان خاوەنی كارەبای 24 سەعاتی بێت، واتە دابینكردنی كارەبای بەردەوام بۆ خاوەنكار و پڕۆژەكان و كەرتە جیاوازەكانی وەك پیشەسازی و بازرگانی، بەهۆیەوە بەرهەم زیاتر دەبێت، كاتێكیش بەرهەم زیاتر بێت، ژێرخانی ئابووری بەهێزتر دەبێت و كوردستانیش لە وڵاتێكی بەكارهێنەرەوە دەكاتە وڵاتێكی بەرهەمهێنەر.
حەمەئەمین هەورامانی، راوێژكاری وزە بە "وشە"ی راگەیاند، پڕۆژەی رووناكی یەكێكە لە پڕۆژە گرنگ و بەهێزەكان كە لە هەرێمی كوردستان جێبەجێ دەكرێت، بەهۆیەوە كوردستان دەكاتە خاوەنی كارەبای 24 سەعاتی، ئەم پڕۆژەیە بەتەواوی خزمەت بە هاووڵاتییان و كوردستانیش دەكات، ئەو پرۆژەیە کە دابینكردنی كارەبای بەردەوامە، ئەمە بەتەواوی لە خزمەتی ئەو پڕۆژە و كارگانەیە كە بەرهەمیان هەیە و پێویستیان بە كارەبای بەردەوام هەیە بۆ ئەوەی كار بكەن، كارەبای بەردەوام، بەرهەمی زیاتری بەدوادا دێت، هەرێمی كوردستانیش پێویستی بەو پڕۆژەیە هەبوو تا لە رووی ژێرخانی ئابووریی خۆی بەهێز بكات و كار بۆ بەهێزكردنی بكات.
روونی كردەوە، هەروەها باشییەكی ئەو پڕۆژەیە لە رووی ژینگەوەیە كە ئەوەش بۆ هەرێمی كوردستان گرنگە، ژینگەی كوردستان پاك دەكاتەوە و ئەو موەلیدانەی لە رابردوودا دووكەڵیان دەكرد و هەوایان پیس دەكرد وەك ئێستە نەمێنێت، ئەمەش دووبارە لە خزمەت بەهێزبوونی ژینگەی كوردستانە.
ناسر ئیسماعیل، شارەزای بواری ئابووری بە "وشە"ی راگەیاند، پڕۆژەی رووناكی خزمەتێكی گەورە و گرنگە بە هاووڵاتییان و چەندان سوودی هەیە، لە داهاتوودا ئەوە بۆ هاووڵاتییان دەردەكەوێت كە چۆن ئەو پڕۆژەیە خزمەتی بە هەمووان كردووە، كوردسانیش وەك هەر وڵاتێك بووەتە خاوەنی كارەبای 24 سەعاتی و لە دووجۆری كارەبا رزگاریان بووە و كارەبایەكی بەردەوامیان هەیە، لە رووی ئابوورییەوە كاریگەریی دەبێت و هەرێمی كوردستان دەباتە قۆناغێكی نوێ، كارەبای بەردەوام واتە بەرهەمهێنانی زیاتر لە بواری پیشەسازی و كەلوپەل و بازرگانی، كە ئەمە بۆ ژێرخانی ئابووری گرنگە و خاڵی بەهێزە.
گوتیشی، ئەو كارەبایەی لە هەرێمی كوردستان بەرهەم دێت تا رادەیەك زۆر باشە، كێشە لە كەمی بەرهەم نییە، تێچوویەكی زۆر بۆ بەرهەمی كارەبا هەیە، بەڵام پێدانی پارەی كارەبا لە لایەن هاوبەشەكانی كارەبا وەك پێویست نییە، ئێستەیشی لەگەڵدا بێت هاوبەشەكانی كارەبا بە تریلیۆن دینار پارەی كارەبا قەرزارن، بۆیە ئەگەر خەڵك پارە نەگەڕێنێتەوە، ئەوەش كێشە بۆ بەرهەمی كارەبا دروست دەكات.
عەلی كەریم شارەزای بواری وزە و كارەبا بە "وشە"ی راگەیاند، دابینكردنی كارەبای 24 سەعاتی بۆ هاووڵاتییان خزمەتی گەورەیە بۆ خەڵك، بەبێ جیاوازی خزمەت بە هەموو هاووڵاتییان دەكات، ئەوەی گرنگە؛ كوردستان لە ئایندەیەكی نزیكدا دەبێتە خاوەنی كارەبای بەردەوام، ئەگەر ئەوە بەشێوەیەكی باش بەكار بهێنرێت، كوردستان لە كەموكورتی رزگاری دەبێت و دەتوانین لە زۆر بواردا خۆمان پێ بگەیەنین.
پێویستە بگوترێت، پڕۆژەی رووناكی لە چەندان گەڕەكی شاری هەولێر جێبەجێ كراوە و بەهۆیەوە كارەبای بەردەوامیان هەیە و 400 موەلیدە لەكار خراون، لە سلێمانیش دەست بە جێبەجێ كردنی كراوە و نۆ هەزار ماڵ پڕۆژەكەیان بۆ بەستراوە و بەردەوامیشە، بەپێی ئەو پلانەی وەزارەتی كارەبا دایڕشتووە، تا ساڵی 2026 تەواوی كوردستان دەبێتە خاوەنی كارەبا 24 سەعاتی.
وشە/ هۆشیار عەلی