دوای جەژنی رەمەزان، لە ناوەڕاستی مانگی نیسان حكوومەتی نوێی كوردستان دێتە راگەیاندن. بەگوێرەی زانیارییەكان تا ناوەڕاستی مانگی داهاتوو، پەرلەمانی كوردستان دەستەی سەرۆكایەتی هەڵدەبژێرێت بۆ متمانە دان بە حكوومەتی نوێ.
كابینەی 10ی حكوومەتی هەرێمی كوردستان، بە سەرۆكایەتیی مەسروور بارزانی دەبێت و یەكێتی وەك حزبی دووەم هاوبەشی لە پێكهێنانی حكوومەتدا دەكات.
گفتوگۆكانی نێوان پارتی و یەكێتی لەبارەی پێکهێنانی حكوومەت بەكۆتا هاتووە، بەتایبەت دوای كۆبوونەوەی رۆژی 16ی ئادار لەنێوان مەسروور بارزانی سەرۆك وەزیرانی كوردستان و بافڵ تاڵەبانی سەرۆكی یەكێتی، كە خۆیان رایان گەیاند، لەسەر زۆر پرسی ستراتجی رێككەوتوون.
سەرچاوەیەكی تایبەت، بە "وشە"ی گوت، هەموو هەوڵێك بۆ ئەوەیە، تا ناوەڕاستی مانگی داهاتوو پەرلەمانی كوردستان كۆ ببێتەوە و حكوومەتی كوردستان بێتە راگەیاندن.
روونیشی كردەوە، رێككەوتنی پارتی و یەكێتی گەیشتووتە قۆناغی كۆتایی، زۆرینەی پۆستەكانیش یەكلا بوونەتەوە.
هەر ئەمڕۆش د.پشتیوان سادق ئەندامی شاندی دانوستانی پارتی ئەوەی راگەیاند كە دوای جەژن لەگەڵ یەكێتی پۆستەكان یەكلا دەكەنەوە.