لە رووداوەكانی هاتوچۆی ئەم سێ رۆژەی جەژن 53 هاووڵاتی بوونە بەقوربانی

:: PM:03:38:02/04/2025 ‌
بەپێی ئەو ئامارانەی لەلایەن بەڕێوەبەرایەتییەكانی هاتوچۆی ناوچە جیاجیاكانی هەرێمی كوردستان بڵاو كراونەتەوە، لە هەرسێ رۆژی جەژنی رەمەزنی پیرۆزدا، 26 روودوای هاتوچۆ روویان داوە و بەهۆیانەوە 53 هاووڵاتی بوون بەقوربانی.

هەر بەپێی ئامارەكان، ژمارەی ئەو كەسانەی لە رووداوەكانی هاتوچۆ لە سێ رۆژەكەی جەژنی رەمەزاندا گیانیان لە دەست داوە، پێنج كەسن و ژمارەی بریندارەكانیش 48 كەس بوون.

لە رۆژی یەكەمی جەژنی رەمەزانی پیرۆزدا لە سنووری پارێزگای سلێمانی، 21 رووداوی هاتوچۆ روویان داوە كە بەهۆیەوە سێ هاووڵاتی گیانیان لە دەست داوە و 27 كەسی تر بریندار بوون، 17ـیان برینداری رووداوی هاتوچۆی ئۆتۆمبێل و 10ـی تریان لە ڕووداوی هاتوچۆی ماتۆڕسكیل بریندار بوون.

لە دووەم رۆژی جەژنی رەمەزاندا لەسەر رێگەی كەلار باوەنوور، رووداوێكی هاتوچۆ لە جۆری پێكدادان لە نێوان ئۆتۆمبێلێك و ماتۆڕسكیلێكدا رووی دا، بەهۆیەوە شۆفێری ماتۆڕكسیلەكە بەسەختی بریندار بووە و بۆ وەرگرتنی چارەسەری پێویست، رەوانەی نەخۆشخانەكانی شاری سلێمانی كرا.

لە سێیەم رۆژی جەژنیشدا چوار رووداوی هاتوچۆ لە كەركووك، سۆران، كۆیە و سلێمانی روویان داوە و بەهۆیەوە كچ و باوكێك لەسەر رێگەی سلێمانی- پێنجوێن گیانیان لە دەست داوە، هاوكات برینداربوونی 20 كەسی تری لێ كەوتووەتەوە.



وشە - سۆران عەزیز