نووسینگەی پارێزگاری هەولێر رای گەیاند، بەپێی ئەو پلانەی بۆ سێ ڕۆژی جەژنی ڕەمەزان لەلایەن لیژنەی تەناهی پارێزگای هەولێر و بە مەبەستی پاراستنی ئارامی و ئاسایش شار و سەروماڵ و سەلامەتی گیانی هاووڵاتییان دانرابوو، پلانەكە بەبێ گیروگرفت جێبەجێ كرا.
نووسینگەی راگەیاندنی پارێزگاری هەولێر ئەمڕۆ چوارشەم دووی نیسان، راگەیەنراوێكی بڵاو كردەوە و تێیدا هاتووە، ئاماری گشتیی ژمارەی هاتنی گەشتیاران و ڕووداوەكانی ڕۆژانی جەژنی ڕەمەزانی پیرۆزی ئەمساڵ، لە سنووری پارێزگاكەمان بەمشێوەیەی خوارەوە بووە:-
یەكەم/ گەشتوگوزار
بۆ ڕۆژانی جەژنی ڕەمەزان، وەك چۆن داڕێژرابوو تەواوی بڕگەكانی وەك خۆی و بە سەركەوتوویی جێبەجێ كران، لەوانەش دانانی لیژنەی تایبەت بۆ دابینكردنی خزمەتگوزاریی پێویست بۆ گەشتیاران لە بازگەكان، دابەشكردنی ژمارەی تەلەفۆنی لیژنەكان بەسەر گرووپە گەشتیارییەكان و گەشتیاران بۆ ئەوەی ھاوكاربن بۆ چارەسەركردنی هەر ڕووداوێك یان گیروگرفتێك. هەروەها پێكھێنانی لیژنەی تایبەت بۆ بەدواداچوون لە ڕەوشی گەشتیاران لە بنكە گەشتیارییەكان بە مەبەستی دڵنیابوون لە پێشكەشكردنی خزمەتگوزاری تەواو بە گەشتیاران لە بنكە گەشتیارییەكان. ژمارەی ئەو گەشیارانەشی تەنیا لە ڕۆژانی پشووی جەژن سەردانی هەولێری پایتەختیان كردووە بریتی بووە لە 76 هەزار و 654 گەشتیار.
دووەم/ ئاسایشی هەولێر
بەپێی ئەو پلان و ئامادەكارییانەی لەلایەن بەڕێوەبەرایەتیی ئاسایشی هەولێر داڕێژرابوو، پلانەكە وەك خۆی و بەبێ هیچ گرفتێك جێبەجێ كرا و بۆ هەرحاڵەتێكی پێویستیش، سەرجەم هێزەكانی ئاسایش لە ئەركدا بوون.
سێیەم/ پۆلیس
سەرجەم هێزەكانی سەربە بەڕێوەبەرایەتیی پۆلیسی هەولێر لە هەموو بەش و هۆبەكان، لە هەرسێ ڕۆژی جەژنی ڕەمەزان لە ئامادەباشی تەواودا بوون و پلانەكان وەك چۆن داڕێژرابوون، تەواوی بڕگەكانی وەك خۆی و بە سەركەوتوویی جێبەجێ كراون، ئاماری تاوانەكان لە ڕۆژانی جەژندا 28 تاوان تۆمار كراوە.
چوارەم/ هاتوچۆ
لەبارەی پلانی بەڕێوەبەرایەتیی هاتوچۆی هەولێر بۆ ڕۆژانی جەژنی ڕەمەزانی پیرۆز، بەداخەوە بەهۆی پابەندنەبوونی شوفێران بەڕێنوێنی و یاساكانی هاتوچۆ و لێخوڕینی خێرا، چوار ڕووداوی هاتوچۆ ڕوویان دا و لە ئەنجامیاندا 12 كەس بریندار بوون.
پێنجەم/ بەرگریی شارستانی
تەواوی بنكەكانی بەڕێوەبەرایەتیی بەرگریی شارستانیی هەولێر بۆ ڕۆژانی جەژنی ڕەمەزان لە ئەركدا بوون، لەو ماوەیەشدا نۆ حاڵەتی ئاگركەوتنەوە هەبووە، سەرجەم حاڵەتی ئاگركەوتنەوەكانیش لەلایەن تیمەكانی بەرگریی شارستانییەوە كۆنترۆڵ كراون و خۆشبەختانە جگە لە زیانی مادی، هیچ زیانێكی گیانییان لێ نەكەوتووەتەوە.
شەشەم/ بەڕێوەبەرایەتیی گشتیی تەندروستی
لە سێ ڕۆژی جەژندا تەواوی تیمە تەندروستییەكان و نەخۆشخانەكان لە ئەركدا بوون، لەو ماوەیەشدا پێنج هەزار و 874 هاووڵاتی سەردانی نەخۆشخانەكانی سنووری پارێزگای هەولێریان كردووە، 119 منداڵ لە دایك بوون كە 71 كوڕ و 48 كچ بوون، 669 نەشتەرگەری جۆراوجۆر ئەنجام دراون لەگەڵ 620 حاڵەتی شوشتنی گورچیلە، 159 نەخۆش لە نەخۆشخانەی نانەكەلی چارەسەریان وەرگرتووە و 520 نەخۆشیش لە سەنتەری ئاوات چارەسەری تیشكیان وەرگرتووە.
حەوتەم/ سەرۆكایەتیی شارەوانی
سەرجەم فەرمانگە خزمەتگوزارییەكان و تیمەكانی شارەوانی، لە ڕۆژانی جەژن لە ئەركدا بوونە و لەو سێ رۆژە شەش هەزار و 956 تۆن زبڵ و پاشماوە لە سنووری سەرۆكایەتیی شارەوانیی هەولێر كۆ كراونەتەوە و لە زبڵخانەی كانی قڕژاڵە فڕێ دراون.