بەپێی پێشبینییەكان لە سبەی شەوەوە شەپۆلێكی بەهێزی بارانبارین ڕوو لە هەرێمی كوردستان دەكات و لە هەندێك ناوچە مەترسی لافاو هەیە.
ئەمڕۆ پێنجشەم سێی نیسان، شاڵاو هیدایەت شارەزای بواری كەشناسی ڕای گەیاند، بەگوێرەی پێشبینییەكانمان، لە سبەی شەوەوە لە ئەنجامی هاتنی شێیەكی باشی مەداری ناوچەی كەمەرەییەوەیە كە بەسەر دەریای سووردا دێت و بڕێك شێی ئەو دەریایەش لەگەڵ خۆی دێنێت، هەرێمی كوردستان و ناوچەكە دەكەوێتە ژێر كاریگەریی حاڵەتێكی بەهێزی ناجێگیری كەشەوە و بەهۆیەوە بڕێكی باش باران و تەزرە دەبارێت.
دەشڵێت، بەهۆی ئەم شەپۆلەوە لە ناوچەكانی سنووری سلێمانی و هەڵەبجە و ئیدارەی ڕاپەڕین، بڕێكی زۆرباش باران دەبارێت و هاوكات لە سنووری پارێزگای هەولێر و ئیدارەی گەرمیان و سنووری كەركووكیش، كاریگەریی زیاتر دەبێت و ئەگەری كۆبوونەوەی ئاو و دروستبوونی لافاو هەیە.
ئەو شارەزایەی بواری كەشناسی ئەوەشی خستەڕوو، ئەو شەپۆلی بارانبارینە كە خۆی دەبینیێتەوە لە تاوەبارانی بەخوڕ و هەورەبروسكە و زیادبوونی خێرایی با و تەزرە، لە هەندێ ناوچە لە مەودای حاڵەتەكەدا هەوری كۆمۆلۆنیمبۆس و سۆپەرسێڵ دروست دەبێت كە هەڵگری بارانی باشن، بەتایبەت سوپەرسێڵ كە پڕ باراناویترین جۆری هەورە، هاوكات كاریگەریی ئەم شەپۆلە تا ڕۆژی یەكشەم دەمێنێتەوە.