لەمیانی چاوپێكەوتنێكی میدیاییدا گوتەبێژ بە ناوی حكوومەتی عێراق رای گەیاند كە بودجەی ساڵی پاری عێراق 212 ترلیۆن دینار بوو، لەم بڕەیشدا 156 ترلیۆنی خەرج كراوە كە 90 ترلیۆنی بۆ مووچە بووە كە بەمەیش پشتڕاستی داتاكانی حكوومەتی هەرێمی كوردستانی كردەوە كە پێشووتر حكوومەتی هەرێم رای گەیاند بوو لە كۆی بودجەی عێراق تەنیا %6ی بۆ هەرێم نێردراوە، هەر بەم هۆیەیشەوە مووچەی مانگی 12ی مووچەخۆرانی هەرێم لەلایەن عێراقەوە خوراوە.
ئەمشەو چوارشەم 12ی ئاداری 2025، باسم عەوادی لە میانی چاوپێكەوتنێكی تەلەفزیۆنیدا رای گەیاند كە بودجەی پار ساڵی عێراق 212 ترلیۆن دینار بووە و 156یش لە بودجەكە خەرج كراوە و بەم پێیە 56 ترلیۆن لە بودجەی پار ساڵدا مابووەوە و مووچەی مووچەخۆرانی هەرێمیش بۆ 12 نەنێردراوە كە تەنیا ترلیۆنێك دیناری پێویست بووە.
عەوادی ئەوەیشی گوت كە 90 ترلیۆن دیناری بودجەی پار ساڵ لە مووچە خەرج كراوە و 40 ترلیۆنیش بۆ كاروباری تەشغیلی و وەزارەتەكان و 27 ترلیۆنیش بودجەی وەبەرهێنان بووە.
عەوادی ئاماژەیشی كرد كە 12 ترلیۆن دینار لە بودجەی وەبەرهێنانی پار ساڵ ماوەتەوە بەو پێیەی كە نرخی بەرمیلێك نەوت بە 70 دۆلار تا 73 دۆلار خەمڵاندنی بۆ كرابوو.
ئەم قسانەی گوتەبێژی حكوومەتی عێراق دووپاتكردنەوەی لێدوانەكانی چەند مانگێك لەمەوبەری وەزارەتی دارایی و ئابووریی و حكوومەتی هەرێمی كوردستانە، دوای ئەوەی مووچەی مانگی 12ی مووچەخۆرانی هەرێم نەنێردرا، حكوومەتی هەرێم رای گەیاند كە لە كۆی بودجەی عێراق تەنیا %6ی بۆ هەرێمی كوردستان نێردراوە كە بڕەكەی كەمترە لە 10 ترلیۆن و 500 ملیۆن دینار.