ژبەر پێدڤیا دەڤەرێ و گرنگیدان ب دەڤەرێن دەوروبەر، رێڤەبەریا گشتی یا وەبەرهێنانێ ل پارێزگەها دهۆکێ مۆلەتا وەبەرهێنانێ دایە کومەلگەهەکا مودێرن یا خزمەتگۆزاری و پێشەسازیا ترومبێلا ل ئاکرێ کو پتری 300 جهان بخوڤە دگریت.
فەلاح حاجی، بەرپرسێ راگەهاندن و پەیوەندیان ل رێڤەبەریا گشتی یا وەبەرهێنانێ ل پارێزگەها دهۆکێ بۆ وشە گۆت، کۆمەڵگەها سۆزڤین یا خزمەتگوزاریێن پیشەسازیا ترومبێلان کو دکەڤیتە دەڤەرا کۆن سیخۆڕ ل سنوورێ باژێڕڤانیا ئاکرێ، ئێکە ژ پڕۆژێن گرنگ و مودێرن یێن خزمەتگۆزاری وپێشەسازیێن ترومبێلن؟ل کوردستان و پارێزگەها دهۆکێ، دێ خزمەتەکا باش بو شوفێرا کەت.
زێدەتر گۆت، پڕۆژە پێکدهێت ژ 43 پیشانگەها ترمبێلان یێن ناڤنجی و بچوک، ل گەل هەشت پێشانگەها ترومبێلێن قەبارە مەزن و بارهەلگر، 240 جهێن چاککرنا ترومبێلان و ئامیران، دیسان هەشت جهێن چاککرنێ یێن مەزن و پێنج جهێن شۆشتنا ترومبێلێن قەبارە مەزن و بچوک و جهێن پشکنینین کۆنترۆلکرنا ترمبێلان و هژمارەکا خوارنگەهان و کشک و باخچە و کوریدۆران، دیسان خزمەتگوزاریێن وەک بنگەهێ پۆلیسان، بنگەهێ ئاگرێ ڤەمراندنێ و مزگەفت و ئۆتێل ژی دناڤدا هەنە.
ناڤبری دیارکر ژی کو دەمێ پڕۆژەیی شەش ساڵن و گۆتژی، پروژە دێ ب کوژمێ (49 ملیون و 994 هزار دولاران ل سەر رووبەری ئێک ملیون مەتر دوجا ژلایێ کۆمپانیا دابین گرۆپ ڤە هێتە بجهئینان.
هەرئێک ژ ئاکرێ، شێخان، بەردەڕەش و دەوروبەر دێ مفای ژێوەرگرن و هزاران کەس تێدا کارکەن.