کۆمەڵەی پیشەسازیی نەوتی کوردستان (ئەپیکور) راگەیێندراوێکی بڵاوکردەوە و تێیدا دەڵێت، لە ڕێكار و هەنگاوەكانی وەزارەتی نەوتی عێراق بۆ هەناردەکردنەوەی نەوتی کوردستان ناڕازین.
ئەمشەو هەینی 28ی ئادار، کۆمەڵەی پیشەسازیی نەوتی کوردستان (ئەپیکور) رای گەیاند، کۆمپانیا نێودەوڵەوتییەکانی نەوت و حکوومەتی هەرێمی کوردستان بە نیازێکی پاکەوە لەگەڵ حکوومەتی عێراق و نووسینگەی محەمەد شیاع سوودانی، سەرۆک وەزیرانی عێراق دەستیان بە گفتوگۆ کرد و ئامانجی کۆبوونەوەکان گەیشتن بوو بە بڕیارێک بۆ دەستپێکردنەوەی هەناردەی نەوت کە هاوتەریب و گونجاوبێت لەگەڵ رێککەوتنە یاساییەکان و بودجەی عێراق.
بەڵام وەک ئەكیپور نووسیویەتی، بۆمان ڕوون بووەوە کە وەزارەتی نەوتی عێراق ئامادە نییە گفتوگۆ لەسەر چارەسەرێک بکات کە تێیدا رێز لە گرێبەستەکانی ئێمە بگرێت. وەزارەتی نەوتی عێراق هەوڵ دەدات رێگەیەک بگرێتەبەر کە بەشێوەیەکی تاکلایەنە جێگرەوەیەک بۆ چوارچێوە یاساییەکە و گرێبەستە بەرکارەکانمان لەگەڵ حکومەتی هەرێمی کوردستان دابنێت.
ئەوەش خراوەتە ڕوو كە کۆمپانیا ئەندامەکانی کۆمەڵەی ئەپیکور ئەو هەنگاوانەی عێراقیان بە "قبووڵنەکراو" ناوبردووە و دەڵێن، تاوەکو پابەندبوونێک لە حکوومەتی عێراقەوە نەبێت، ئامادەنین دەست بە هەناردەکردنەوەی نەوت بکەین.
داوا دەكەین لەبارەی شێوازی وەرگرتنی پارەی فرۆشی نەوتی رابردوو و داهاتوو دڵنیاییەک هەبێت. وایان نووسیوە.