ئەندامێكی لیژنەی دارایی پەرلەمانی عێراق دەڵێت، هەڵگرتنی پارە لە ماڵەكاندا لەبری بانكەكان، تەنگژەی ئابووری دروست كردووە و وایكردووە گەشەی ئابووری و جووڵە رابگرێت.
مستەفا كەرعاوی بە سۆمەرییە نیوزی گوتووە، پێویستە زووبەزوو بەرپرسانی باڵای عێراق و حكوومەتی عێراق، بیر لەوە بكەنەوە خەڵكی وڵاتەكە متمانە بە بانكەكانی عێراق بكەن و لەبری ئەوەی پارەكانیان لە ماڵەوە هەڵبگرن، بیخەنە بانكە متمانە پێكراوەكان، تا گەشەی ئابووری و ئاڵوگۆڕ و جووڵەی ئابووری دروست ببێت.
كەرعاوی ئاماژە بۆ ئەوەش دەكات، وەك لیژنەی دارایی پەرلەمانی عێراق، زانیارییان لایە پارەی هەڵگیراوی ماڵەكان 100 ترلیۆن دیناری تێپەڕاندووە، هۆكارەكەش ئەوەیە عێراقییەكان متمانەیان بە بانكە عێراقییەكان نییە تا پارەكانیانی لێ دابنێن.