یه‌كێتیی ئه‌وروپا: سیاسه‌تی تره‌مپ زیانێكی زۆر گه‌وره‌ به‌ ئابووریی دنیا ده‌گه‌یه‌نێت

:: PM:12:18:03/04/2025 ‌
ئۆرزولا فۆن دێرلاین سه‌رۆكی ئه‌نجوومه‌نی یه‌كێتیی ئه‌وروپا رای گه‌یاند، باجه‌كانی دۆناڵد تره‌مپ له‌ دژی وڵاتان، زیانێكی زۆر گه‌وره‌ به‌ ئابووریی دنیا ده‌گه‌یه‌نێت.

ئه‌و روونی كرده‌وه‌ كه‌ سیاسه‌ته‌كانی ئه‌مه‌ریكا، ده‌رهاویشته‌ی زۆر خراپی ئابووری به‌دواوه‌ ده‌بێت و ده‌بێته‌ هۆی په‌ره‌پێدانی ناسه‌قامگیری و ژیانی ملیۆنان كه‌س له‌ ته‌واوی دنیا تێكده‌دات.

ئه‌و پێی وایه‌ زیانه‌كان بۆ سه‌ر ناوه‌نده‌كانی كار و كاسبی و له‌ هه‌مووان گرنگتر، باری سه‌ر شانی كڕیاران بۆ دابینكردنی كاڵا و پێداویستییه‌كانیان قورستر ده‌كات.

فۆن دێرلاین پێی وایه‌ ئه‌و سیاسه‌تانه‌ی دۆناڵد تره‌مپ گرتوویه‌ته‌به‌ر، كاریگه‌ریی خراپ ده‌خاته‌ سه‌ر پێوه‌ندییه‌ بازرگانییه‌كانی نێوان ئه‌وروپا و ئه‌مه‌ریكا و خه‌رجییه‌كانی بازرگانیكردن به‌ رێژه‌یه‌كی به‌رچاو به‌رز ده‌كاته‌وه‌.

وه‌ك زیاتر خستیه‌ روو، ئه‌وروپا بیر له‌وه‌ ده‌كاته‌وه‌ به‌رانبه‌ر ئه‌و كرده‌وانه‌ی ئه‌مه‌ریكا، هه‌ڵوێستی هه‌بێت و رووبه‌ڕووی سیاسه‌ته‌كه‌ ببێته‌وه‌ ئه‌گه‌ر دانوستانه‌كان ده‌ره‌نجامیان نه‌بوو.

سه‌رۆكی ئه‌نجوومه‌نی یه‌كێتیی ئه‌وروپا پێداگریی له‌وه‌ كرد، ئه‌گه‌ر هێرشی ئابووریی بكرێته‌ سه‌ر وڵاتێكی ئه‌ندامیان، به‌و واتایه‌یه‌ كه‌ هێرش كراوه‌ته‌ سه‌ر ته‌واوی یه‌كێتییه‌كه‌، بۆیه‌ لێی بێده‌نگ نابن.

پێویسته‌ بگوترێ دۆناڵد تره‌مپ شه‌وی رابردوو باجی به‌سه‌ر زۆربه‌ی وڵاتانی دنیادا سه‌پاند كه‌ رێژه‌ی جیاواز له‌خۆ ده‌گرن، ته‌نانه‌ت عێراق و توركیا و وڵاتانی ناوچه‌كه‌یشی گرتووه‌ته‌وه‌.


وشە - سلێمان تاشان