28 ساڵ بەسەر كۆچی دوایی هونەرمەندی میلی و دەنگخۆش و ناسراوی كورد ئەحمەد شەماڵ تێدەپەڕێت. شەماڵ دوای چەند دەیەیەك هێشتا گوێگرێكی زۆری هەیە.
ئەحمەد شەماڵ ناوی تەواوی ئەحمەد مەحموودە بە "ئەحمەد شەماڵ" یان "ئەحەی خولە سنەیی" ناسراوە، بەهۆی ئەوەی باوكی خەڵكی شاری سنەی ڕۆژهەڵاتی كوردستان بووە، نازناوی سنەیی لە باوكیەوە وەرگرتووە.
ساڵی 1922 لە گەڕەكی چوارباخی سلێمانی، لە خێزانكی هەژار چاوی بە دنیا هەڵهێناوە، ئەو هەژارییەش بەتەواوی لە گۆرانییەكانیدا ڕەنگی داوەتەوە و هەمیشە بەژیانیەوە دیار بووە.
شەماڵ هەرزوو بەهۆی دەستكورتی و هەژاریی خێزانەكەیەوە، دەستی لە خوێندن هەڵگرتووە و ناچار بووە شان بداتەبەر ئەركی رۆژگار.
ئەحمەد شەماڵ وەك زۆر لە خێزانەكانی ئەوكات منداڵی زۆری هەبووە، دوای ئەوەی هاوسەرگیری كردووە، بووەتە باوكی شەش منداڵ كە پێكدێن لە سێ كچ و سێ كوڕ.
ئەحمەد شەماڵ بەشێكی ژیانی لەسەر ئەو دانیشتنانە بووە كە ئەوكات لە ماڵەكانی سلێمانی بەڕێوە چووە و تێیدا گۆرانی بۆ مەجلیس گوتووە، هەر لەو مەجلیسانەشدا گۆرانییەكانی تۆمار كراون و دواتر بڵاو كراونەتەوە.
ساڵی 1954 سەرەتای كاری هونەریی ئەحمەد شەماڵ بووە، لەگەڵ بڵاوبوونەوەی یەكەم بەرهەمیدا هەرزوو لەناو خەڵكدا ناسرا، تا ساڵی 1996 گۆرانیی بۆ میلەتەكەی گوتووە.
هونەرمەند ئەحمەد شەماڵ لە دوای ململانێیەكی زۆر لەگەڵ نەخۆشی، ڕۆژی سێی نیسانی 1997 لە سلێمانی كۆچی دوایی كرد، لە گۆڕستانی سەیوان بەخاك هاتووەتە سپاردن.