ده‌سه‌ڵاتی سه‌ربازیی میانمار، نوێترین ئاماری قوربانییانی بوومه‌له‌رزه‌كه‌ی دوێنێی وڵاته‌كه‌ی بڵاو كرده‌وه و گوتی، له‌م وڵاته سه‌رووی هه‌زار كه‌س گیانیان له ده‌ست داوه، پێشتر ئه‌وه راگه‌یه‌نرابوو كه له تایلاندیش 10 كه‌س گیانیان له ده‌ست داوه.
بوومه‌له‌رزه‌كه به گوڕی 7.7 پله به پێوانه‌ی ریخته‌ر له نزیك شاری ماندالیی پایته‌ختی میانمار رووی دا. 12 خوله‌ك دواتر بوومه‌له‌رزه‌یه‌ك به گوڕی 6.7 پله به پێوانه‌ی ریخته‌ر له نزیك هه‌مان شوێن رووی دا.
پێشبینی ده‌كرێ ژماره‌ی قوربانییان به‌هۆی بوومه‌له‌رزه‌كانی میانمار زۆر له‌وه زیاتر بن كه له‌لایه‌ن به‌رپرسانی ئه‌و وڵاته‌وه راگه‌یه‌نراوه.
به‌گوته‌ی ته‌له‌ڤزیۆنی فه‌رمیی میانمار تا به‌ره‌به‌یانیی ئه‌مڕۆ شه‌موو، هه‌زار و دوو كه‌س گیانیان له ده‌ست داوه و دوو هه‌زار و 376 كه‌سی تر بریندار بوون.
بوومه‌له‌رزه‌كه بووه‌ته هۆی زیانگه‌یاندن به ژێرخانی ئاوه‌دانكردنه‌وه‌ی ئه‌و وڵاته و پرد و شه‌قام و باڵه‌خانه‌كان زیانێكی زۆریان به‌ركه‌وتووه.
گه‌ڕان و به‌دواداچوون بۆ دۆزینه‌وه‌ی خه‌ڵك له ژێر داروپه‌ردووی باڵه‌خانه رووخاوه‌كان درێژه‌یان هه‌یه، روودانی ئه‌و بوومه‌له‌رزه‌یه‌ش له كاتێكدایه كه ئه‌و وڵاته خۆی چوار ساڵه له ئاكامی كوده‌تای سه‌ربازی و شه‌ڕی ناوخۆیی، تووشی دۆخێكی ناله‌بار بووبوو و ژێرخانی ته‌ندروستیی وڵاته‌كه داڕماوه.
ناوه‌ندی بوومه‌له‌رزه‌زانیی ئه‌مه‌ریكا، بوومه‌له‌رزه‌كه‌ی میانماری به به‌هێزترین بوومه‌له‌رزه له‌و وڵاته له ماوه‌ی 100 ساڵی رابردوو داناوه.