بەڕێوەبەرایەتیی گشتیی بەرگریی شارستانیی هەرێمی كوردستان، داوا لە هاووڵاتییان دەكات لە رۆژانی جەژندا، پابەندی رێنوێنییەكان بن بۆ ئەوەی ئاگر نەكەوێتەوە. هەروەها لە كاتی هەر ڕووداوێك پێوەندیی بە ژمارە (115) بكەن.
ئەمڕۆ شەموو 29ی ئادار، بەڕێوەبەرایەتیی گشتیی بەرگریی شارستانیی هەرێمی كوردستان ڕای گەیاند، سەرجەم هێزەكانی بەرگریی شارستانیی لە تەواوی هەرێمی كوردستان خرانە حاڵەتی ئامادەباشییەوە، بەمەبەستی پاراستنی سەروماڵی هاووڵاتییان و جێبەجێكردنی پلانی جەژنی رەمەزان .
بەرگریی شارستانی پلانەكەی خۆیان بەمشێوەیە خستووەتە ڕوو.
1. سەرجەم بنكەكانی ناو شار و دەرەوەی شار لە ئێشكگری تەواودا دەبن .
2. تیمی گەڕۆك بەردەوام دەبن لە شوێنە گشتییەكانی ناو شار و بازاڕەكان .
3. بەهاوئاماهەنگی لەگەڵ دیوانی پارێزگاكان و دەستەی گەشتوگوزار، ناوچە گەشتیارییەكان تیمی گەڕۆكیان لێ جێگیر دەكرێت بۆ پاراستنی گەشتیاران .
بەرگریی شارستانی داوا لە هانیشتمان دەكات بۆ سەلامەتی خۆیان، ئەم ڕێنوێنییانە پێڕەو بكەن :
1. لە كاتی ڕوودانی هەر ڕووداوێك، سەرەتا پێوەندی بە ژمارە (115) بكەن بۆ ئەوەی تیمەكانی بەرگریی شارستانیی بەزووترین كات بگەنە شوێنی ڕووداو .
2. ئەگەر بەمەبەستی گەشت و سەیران لە ماڵ دەرچوویت، باشترە هەموو ئامێرە كارەباییەكان بكوژێنرێنەوە، چونكە لە ماوەی ڕابردوودا زۆرترین حاڵەتی سووتانی ماڵان ڕوویان داوە بەهۆی شۆرتی كارەباوە .
3. ناوچە گەشتیارییەكان بپارێزە وریای پاشماوەی ئاگری چێشتلێنان بن، بەتەواوی بیانكوژێننەوە كە كارت پێیان نەما .
4. خەڵووزی نێرگەلە هۆكاری سەرەكین بۆ كەوتنەوەی ئاگر لە ماڵان و ناوچە گەشتیارییەكان، بۆیە بە وریاییەوە بەكاری بێنە .
5. بەهۆی كەمیی بارانبارین لەمساڵدا، وشكیی خاك و بوونی پووش و پەڵاش و فڕێدانی جگەرە مەترسیدارە، بۆیە كە جگەرەكەت كێشا، لە جامی ئۆتۆمبێلەكەت فڕێی مەدە دەرەوە بەتایبەتی لە ڕێگەكانی دەرەوەی شار.
6. خاوەن هوتێل و موتێلەكان و شوێنە گەشتیارییەكان دەبێت بەتەواوی ڕێنوێنییەكانی بەرگریی شارستانی جێبەجێ بكەن كە پێیان دراوە، چونكە پاڵەپەستۆیەكی زۆریان لەسەر دەبێت، بەهۆی هاتنی گەشتیارانی ناوەڕاست و خوارووی عێراق.
7. شەقامەكانی دەرەوەی شار قەرەباڵغ دەبن، تكایە لە كاتی لێخوڕینی ئۆتۆمبێل پێڕەوی ڕێنوێنییەكانی برایانی پۆلیسی هاتوچۆ بن بۆ سەلامەتیی خۆت و گشتی .
8. لەو ناوچانەی ئاویان لێیە، تكایە مەلە مەكەن و ژیانی خۆتان مەخەنە مەترسییەوە .
9. دایكان و باوكان تكایە ئەگەر بەمەبەستی گەشت چوونە دەرەوە، ئاگاداری منداڵەكانتان بن لەو شوێنانەی ئاویان لێیە، با ڕووداوە ناخۆشەكانی ساڵانی ڕابردوو دووبارە نەبنەوە .
10. لە هەموو بارودۆخێكدا تكایە بەزووترین كات پێوەندی بكەن بە هێڵی گەرمی بەرگریی شارستانیی ژمارە ( 115 )