سەرۆكایەتیی كاروباری ئاینی لە توركیا رای گەیاند، رۆژی یەكشەم یەكەم رۆژی مانگی شەوال و یەكەم رۆژی جەژنی رەمەزانی پیرۆزە، بەڵام هێشتا لە سعوودییە و هەرێمی كوردستان یەكەم رۆژی جەژن دیاری نەكراوە، چەندان وڵاتیش دووشەمیان كردووە بە جەژن.
ئەمڕۆ شەموو، 29ی ئاداری 2025، سەرۆكایەتیی كاروباری ئاینی توركیا بڵاوی كردەوە، بەهۆی بینینی مانگەوە سبەینێ یەكەم رۆژی مانگی شەوال و یەكەم رۆژی جەژنی رەمەزانە.
ئەمشەو لە تەواوی دنیای ئیسلامی چاودێریی بینینی هیلالی مانگی شەوال و دیاریكردنی یەكەم رۆژی جەژنی رەمەزان دەكرێت، جیا لە ناوەندەكانی فەلەكناسی كە باسی ئەوە دەكەن ئەگەرێكی زۆر هەیە سبەی یەكشەم جەژن بێت، ئەمشەو لیژنەكانی بینینی مانگ لە وڵاتانی ئیسلامی بڕیاری كۆتایی دەدەن، لە ئیندۆنیسیا هاتە راگەیاندن كە دووسبەی جەژنە.