ڕاگەیاندنی بەڕێوەبەرایەتیی گشتیی كار و دەستەبەری كۆمەڵایەتی سەبارەت بە كاركردنی كرێكاران لە ڕۆژانی پشووی جەژن و پشووە فەرمییەكان، راگەیەنراوێكی بڵاو كردەوە و ئاماژە بەوە دەكەن، لە سێ ماددەدا لە یاسای كار، ژمارە 71ی ساڵی 1987 دا ئەم بابەتە باس كراوە.
لە راگەیەنراوەكەدا هاتووە، بەپێی مادە 75 كرێكار پشووی ڕۆژانی جەژن و پشووە فەرمییە بڕیار لێ دراوەكان بەپێی یاسا، بەسەر دەبات و كرێی تەواوەتی وەردەگرێت، واتە لە پشووە فەرمییەكاندا كرێكار مافی خۆیەتی لە پشوودا بێت و كار نەكات، هەروەها نابێت خاوەنكار لە بەرانبەر ڕۆژانی پشوو لە كرێیەكەی كەم بكاتەوە، بەڵام بەپێی مادە 76، چەند حاڵەتێك هەیە كە تیایدا ڕێگە دەدرێت كرێكار بەكار بخرێت لە ماوەی ڕۆژانی جەژن یان پشووە فەرمییەكان، جگە لە پشووی هەفتانە. واتە خاوەنكار دەتوانێ داوا لە كرێكارەكان بكات لەم ڕۆژانەدا كار بكەن، بەڵام بەو مەرجەی كرێكارەكە لەم ڕۆژانەدا لە پشووی هەفتانەی خۆیدا نەبێت، هەروەها بەرانبەر ئەم كاركردنە جگە لە كرێی خۆی، دەبێت خاوەنكار كرێی دووهێندە بدات بە كرێكارەكە.
بەرێوەبەرایەتییەكە ئەو حاڵەتانەی كە ڕێگە دەدرێت خاوەنكار، كرێكارەكان بەكار بخات ئەم هۆكارانەن كە لە مادە 63 دا هاتووە بەمشێوەیە روونكردووەتەوە.
1. ئەگەر كاركردن بێت بۆ ڕووبەڕووبوونەوەی پەستانێكی نائاسایی بەهۆی جەژنەكان یان كارە وەرزییەكان یان جیا لەوە.
2. ئەگەر كاركرن بێت لەپێناو چاكسازی یان چاك كردنەوەی دەزگا و كەرەسته و ئامێرەكان كە تێكچوونیان دەبێتە مایەی وەستان لە كار یان بێكار بوونی ژمارەیەكی زۆر لە كرێكاران.
3. ئەگەر هاتوو كارەكە لەپێناو ڕێگەگرتن بوو لە ڕووبەڕووبوونەوەی لەناوچوونی كاڵا و بەرهەمەكان.
4. ئەگەر هاتوو كاركردن بێت لەپێناو ئەژمێرەی ساڵانه و ئامادەكردنی بودجە و ئامادەكردنی پاكتاوكردنی وەرزی و كردنەوەی وەرزی نوێ.
لە هەموو بارێكدا، لە كاتی كاركردنی كاتژمێری زێدەكی و كاركردن لە جەژن و پشووە فەرمییەكاندا، نابێت كاركردنی ساڵانەی كرێكار زیاتر بێت لە 300 سەعات لە ساڵێكدا.
هەروەها ئاماژەیان داوە، لە كاتی بوونی هەر سەرپێچییەك دەتوانن پێوەندی بكەن بە هێڵی هۆشیاری كرێكاران: (07721225500 , 07511225500 , 5500) بە پەیوەندی تەلەفۆنی، واتسەپ، ڤایبەر