بەشێكی زۆری لەشی مرۆڤ لە ئاو پێك هاتووە و ئاو سەرچاوەی ژیانی زیندەوەرانە، شارەزایانی تەندروستی بە بەردەوام رێنوێنی دەدەن بە پێویستیی خواردنەوەی بڕێكی گونجاوی ئاو بۆ ئەوەی لەش و ژیانی مرۆڤ ئاسایی بێت، حاڵەتێك هەیە بە ناوی ژەهراویبوون بە ئاو، كە بەهۆی زۆر خواردنەوەی ئاوەوە دروست دەبێت، بەڵام ئاخۆ لە رووی زانستییەوە پێویستە رۆژانە چەند ئاو بخورێتەوە؟
پزیشكانی سەنتەری مۆسكۆ بۆ نەشتەرگەریی رێڕەوی میز ئاماژە دەكەن، هەندێك خۆراك هەن مرۆڤ لە دروستبوونی بەردی گورچیلە دەپارێزن، وەك گێزەر و هەندێك جۆری گوڵی كێوی بەهۆی ئەوەی ڤیتامین ئەیان تیادایە، گە ئەوەش بە ئەرێنی كار لە پەردەی لینجی ناوپۆشتی لوولەكانی میز دەكات، جیا لەوانە پێویستە بڕی گونجاو و پێویستی ئاو بخورێتەوە.
د. ڤیجین مالكاسیان سەرۆكی بەشی رێڕەوی میز لە ناوەندەكە دەڵێت، پێویستە رۆژانە تا دوو لیتر ئاو بخورێتەوە، بەڵام گرنگە چاودێریی قەبارەی رۆژانەی میز بكرێت، لای خۆیەوە د. سێرگی ئاگابكین پسپۆڕێكی تری رێڕەوی میز دەڵێت، نابێت ئەو بڕە ئاوەی مرۆڤ رۆژانە دەیخواتەوە لەو بڕە شلەمەنییە كەمتر بێت كە لە هەمان ماوە ونی دەكات.
روونی دەكاتەوە، ژنان رۆژانە سێ میلیلیتر بۆ هەر كیلۆگرامێك لە لەشیان ئاو لە رێگەی ئارەقەكردن و هەناسەدان و میزەوە ون دەكەن، پیاوانیش چوار میلیلیتر بۆ هەر كیلۆگرامێك، بۆیە نابێت ئەوان كەمتر لەو بڕە ئاو بخۆنەوە.
جیا لە زۆر خواردنەوەی ئاو، پێویستە بڕی خوێ لە خۆراكی رۆژانە كەم بكرێتەوە، چونكە دەبێتە هۆی لابردنی كالیسیۆم لە میز، كە ئەو مادەیە زۆر جار بەرد دروست دەكات، هەروەها پزیشكان رێنوێنی دەدەن بە سنوورداركردنی خواردنی پرۆتینی ئاژەڵی و بەرهەمەكانی شیرەمەنی لە خۆراكی رۆژانە، لە بەرانبەر زیادكردنی ریشاڵەكان و زیادكردنی جووڵانەوە و چالاكیی جەستەیی.