لە خواردنی ئێوارەوە تا دەگاتە بەیانی، زۆر هەن هەست بەئاوسانی سك دەكەن كە ئەویش ئاوی زیادەیە لە جەستەدا دەمێنێتەوە و مرۆڤ تووشی داهێزرانی جەستە و خەواڵوویی دەكات، بۆ ئەوەیش پسپۆرانی بواری تەندروستی ئامۆژگاریمان دەكەن هەندێك چالاكیی هەن، پێویستە بەرلە خواردنی بەیانی ئەنجامی بدەن بۆ رزگاربوون لە ئاوی زیادەی جەستە.
پێگەی "عەرەبیە" كە هەواڵەكەی لە پێگەی "تایمز ئۆف ئیندیا" وەرگرتووە كە پسپۆران قسەیان بۆ ئەو پێگەیە كردووە و دەڵێن، مەگنسیۆم رۆڵی زۆر گرنگ دەگێڕێت بۆ هاوسەنگی ئاو و شلەمەنی لە جەستەی مرۆڤ، بۆ ئەوەیش پێویستە ئاوی لیمۆ لەگەڵ هەندێك خوێی هیمالایا یان ئاوی گوێزی هیندی، لەو ئاوسانەی ئاو لە سكدا رزگارتان دەكات. جیالەوەی مەگنسیۆم رۆڵی هەیە لە خاوكردنەوەی ماسولكەكان و ئەركی گورچیلەكانیش ئاسانتر دەكات، لە هەموو گرنگتر رزگاربوونە لە ئاوی زیادەی جەستە.
هاوكات پسپۆران ئاماژە دەدەن كە زۆر هەن پێیان وایە چالاكیی وەرزشیی بەیانیان زیاتر هۆكارە بۆ سووتاندنی چەوریی جەستە، بەڵام راستییەكەی ئەو چالاكییە رۆڵی گرنگی هەیە لە رزگاربوون لە ئاوی زیادەی جەستە، ئەگەر چالاكییە وەرزشییەكان بە لەسەرخۆیی و نەرمی بكرێن. بۆ ئەوەیش دەڵێن وەرزشی یۆگا پێویستە، هەروەها هەڵبەزین لەسەر پەنجەكانی پێیەكان بۆ ماوەیەكی كەم، لەگەڵیدا جووڵەی شانەكانیش رۆڵیان هەیە بۆ خاوكردنەوەی ماسولكەكان كە دواتر هۆكارە بۆ نەهێشتنی ئاوی زیادەی جەستە.
هەروەها پسپۆران ئەوەیش دەڵێن، بەیانیان لە دوای هەستان لە خەو، باشترین چالاكی ئەنجامی بدەن، خۆشوشتنە بە ئاوی سارد كە ئەوەیش هۆكارە بۆ رزگاربوون لە ئاوی زیادەی سك و ئاوسان، ئاوی سارد جووڵە بە خوێن و هاتوچۆ بە دەمارەكان دەكات و هانی جەستە دەدات مادە ژەهراوییەكان لە رێگەی لیمفاوی دەربدات، جیالەوەی سوودی بۆ پێستیش هەیە. بەشێوەیەكی گشتی ئاوی سارد بەتایبەتی لە بەیانیان، وزە بە جەستە دەدات و چالاكتری دەكات.
دواتریش پسپۆران باس لە ماندووبوونی شاراوە دەكەن كە لە جەستەدا دەمێنێتەوە و ئەویش هۆكارە بۆ زیادەی ئاو لە جەستە، هاوكات هۆكارە بۆ بەرزبوونەوەی ئاستی كۆلیسترۆڵ كە هۆرمۆنی دڵەڕاوكی بەرز دەكاتەوە، دواتریش دەبێتە هۆی زیادبوونی ئاو لە جەستە، بۆیە گرنگە بەیانیان هەناسە قووڵ بۆ ماوەی چەند چركەیەك هەڵبمژن، جیا لە رزگاربوون لە ئاوی زیادە لە جەستە، هاوكات ئاسوودەیی بە مێشك دەدات و هێمن و هێورتری دەكاتەوە.