شه‌مێ دێرو و حه‌سه‌ن كو ب دایكا شه‌مێ هێته نیاسین ئێكه ژ وان ئافره‌تێن كو زورترین قوربانى د مالا وان دا دناڤ كومكوژیا شنگال و ئێزدى دا هه‌یه كوه ژماران 33 كه‌س، ئه‌و دبێژیت داخواز دكه‌ین كو ئێخسیرێن وان ل كه‌مپا هولێ بهێنه رزگاركرن.
دایكا شه‌مێ بۆ "وشه" دبێژیت، ئه‌ڤه هه‌شت سال ل سه‌ر كومكوژیا شنگالێ دا بورین و هێشتا برینێن مه سارێژ نه‌بوینه و هه‌ر روندك و حه‌سره‌تا بۆ كه‌سوكارێن خوه د هێلین، 33 كه‌س ل مالا من هاتینه كومكوژكرن ل شنگالێ و هژماره‌كا دى هاتینه گرتن و هێشتا نه‌هاتینه رزگاركرن).
زێده‌تر گۆت: (خێزانا من ته‌راوبه‌رابوو، هه‌ڤژین و سێ كچ و شه‌ش كور، ل گه‌ل ئه‌ندامێن خێزانا من كو دبنه 33 كه‌س هاتینه كومكوژكرن، ئه‌گه‌را سه‌ره‌كى یا شه‌هیدكرنا ئه‌ندامێن خێزانا من ئه‌و بوو كو ئێزدى بون و داعشێ دخواست ئاینێ وان بگوهریت، ئه‌وان ژی خوه ده‌ستڤه نه‌به‌ردا).
شه‌مێ د درێژاهیا ئاخفتنێن خودا دیاركر ژی كو ره‌وشا وان نوكه ل كه‌مپا چه‌م مشكو ل دهۆكێ د نه‌خوشیان دایه و گۆت ژی: (داخوازێ ل حوكمه‌تا هه‌رێما كوردستانێ و حوكمه‌تا عیراقێ ژی دكه‌ین كو مه ڤه‌گه‌رینن شنگالێ و ده‌ڤه‌را مه ئارام بكه‌ن، یان ژی دناڤ ڤان كه‌مپان دا خانیان دروست بكه‌ن، ژبه‌ركو ره‌وشا مه دناڤ ڤان كه‌مپان دا زۆر نه‌خوشه و گه‌رمه و خزمه‌تگۆزارى وه‌كو پێدڤى نینن و جهێ مه به‌رته‌نگه).
شه‌مێ كو نوكه ل كه‌مپا چه‌م مشكو ل سنورێ زاخۆ دژیت و ناڤ سال دا چویه، زێده‌تر گۆت: (داخوازا مه‌یا سه‌ره‌كى ئه‌وه كو ئه‌و كچ و ژن و كورێن كو هه‌تا نوكه چاره‌نڤیسێ وان نه‌دیاره و هاتینه ئێخسیركرن بهێنه ڤه‌گه‌راندنڤه ب تایبه‌تى ئه‌وێن كه‌مپا هولى ل سوریێ ژبه‌ركو زۆر كه‌س ل وێرێ نه و ره‌وشا وان و گیانێ وان د مه‌ترسیێ دایه)