کەزان ئێکە ژ کەرستەیێن چیایی و ل پرانیا دەڤەرێن کوردستانێ هەنە، دەڤەرا زێبارێ ل سنورێ قەزا ئاکرێ و ئامێدیێ زورترین کەزان هەنە و خەلکەکێ زور بو کومکرنا وان دچن و پرانیا وان ژی د فروشن.
نزار زادە، وەلاتییەکێ دەڤەرا زێبارێ یا سەر ب ناحیا شێلادزێ ییە بو "وشە" گوت، ئەڤ سالە وەکو سالێن بوری کەزان بەرهەمێ وێ باش نیە و کێمە، بەلێ بهایێ وێ ل بازاڕی باشە و خواستەکا زور ل سەر هەیە.
زێدەتر گوت، پشکەک ژ وەلاتیان کەزانان ب سادەیی د فروشن، پشکەک ژی وەکو تەحینێ د هێرن و دکەن پێخوارن و ل سپێدەهیان د خون، دیسان هندەک ژی دکەن چەرەز، سێ جورێن کەزانان ل دەڤەرا مە یێن هەیی، کەزان باقلی کو یا مەزنە و رەنگ و تامەکا جودا هەیە و بهایێ وێ پترە ژ 30 هزار دیناران، ئێک ژ سالوخەتێن وێ ژی دشیاندایە تزبحان لێ دروست بکەن، جورێ دویێ کەزانا نورمالە و ل دەڤەرێن کوردستانێ هەموان هەیە، جورەکێ دن هەیە دبێژنێ بێمک کو جورێ وێ بچوکە و نەرمە.
ناڤبری دیارکر ژی کو سالانە د روژەکا دیارکری دا خەلکێ گوندی و دەڤەرێ دچنە چیایی بو کومکرنا کەزانان و گوت، گرانکاریێن کەشوهەوایی و دەرکەفتنا هندەک نەخوشیان کارتێکرن ل کەزانان کریە، ئەگەر ئالیێن شولەژێ و خەلک ژی گرنگی ب کەزانان بدەن دێ داهاتەکێ باش بو خەلکی زڤریت ڤە، ب تایبەتی ئەگەر بازاڕ بو بهێتە پەیداکرن.
شیمال بەرواری، ئەو ژی وەلاتیەکێ دەڤەرا ئامێدیێ یە بو "وشە" دیارکر کو ئەو و ل گەل خێزانا خوە و هندەک ژ خەلکێ گوندی ئەڤڕۆ چوینە چیایێن دەڤەرێ بو کومکرنا کەزانان و گوت، کەزان بەرهەمەکێ ب تام و خوشە و خوارن و چەرەزەکا گرنگە ب تایبەتی ئەگەر مروڤ ل وەرزێ زڤستانێ بخوت و بو مێهڤانان بینیت، ئەم ژی ئەڤرۆ چونە چیایی و سوپاس بۆ خودێ مە تێرا خوە ئینان، ئەگەر مروڤ بچیتە جهێن بلند و هەتا ئێڤاری بمنیت دشیاندایە روژانە هەتا 10 کیلویێن کەزانان بینیت، کیلو ژی دناڤبەرا پێنج هزار بۆ 30 هزار دیناران ل بازاڕی دهێتە فروتن.
زێدەتر گوت، جهێ داخێ یە پشکەکا هەری زور یا خەلکێ دەڤەرێ نەشێن بچنە سەر گوندێن خوە بۆ کومکرنا بەرهەمێن چیایی ژبەر شەر و ئالوزی و بوردمانێن تورکیا، ئەگەر رێیا خەلکی ڤەکری بیت دێ هژمارەکا زور یا خەلکی شێن داهاتەکێ بخوە پەیدا بکەن و پێدڤی مووچەی و کارێن دی نابیت.
ل شێلادزێ و دینارتە دوو ئاشێن تایبەت ب کرین و هێرانا کەزانان هەنە، سالانە رێژەییەکا زور یا کەزانان دهێنە کومکرن و هێران، کیلویا کەزانان هێرای نێزیکێ 15 هزار دیناراییە.