تیمێكی چاودێریی بازرگانیی هه‌ولێر ده‌ست به‌سه‌ر 46 هه‌زار قوتووی شیری منداڵاندا ده‌گرن كه گومان ده‌كرێت ڕێكه‌وتی به‌سه‌رچوونیان نوێ بكرێته‌وه یان دووباره له قوتوونانی بۆ بكرێت و بخرێته بازاڕه‌وه.
تیمی چاودێری خاوه‌نه‌كه ده‌گرن و ڕووبه‌ڕووی یاسای ده‌كه‌نه‌وه و ده‌ست به‌سه‌ر شیره به‌سه‌رچووه‌كه‌شدا ده‌گرن.
هۆگر عه‌لی، به‌ڕێوه‌به‌ری چاودێریی بازرگانیی هه‌ولێر، به فه‌رمانگه‌ی میدیا و زانیاری ڕاگه‌یاند، "له گوندێكی نزیك شاری هه‌ولێر، 1706 كارتۆن شیری به‌سه‌رچوومان له ماڵێك دۆزییه‌وه؛ لێكۆڵینه‌وه‌ی به‌رده‌وام ده‌كه‌ین بۆ زانینی ئه‌وه‌ی كه ئایا ئه‌م شیره بۆ چ مه‌به‌ستێكی تر به‌كاردێت، ئه‌و كه‌سه‌مان گرتووه كه ئه‌م كاره‌ی كردووه و لێكۆڵینه‌وه‌ی به‌رده‌وام ده‌كه‌ین تاوه‌كو ده‌گه‌ین به ده‌رئه‌نجام".
روونیشی كرده‌وه، له مانگی ڕه‌مه‌زان به‌هۆی زۆریی خواستی هاووڵاتییان بۆ خواردن، كاری لیژنه‌كانیان چڕتر كردووه‌ته‌وه و به‌رده‌وامن له گه‌ڕان له شاری هه‌ولێر؛ هه‌ر لیژنه‌یه‌ك له سێ كه‌س پێك هاتوون و سه‌ردانی هه‌موو شوێنێك ده‌كه‌ن و زیاتر سه‌رنج له ڕێكه‌وتی به‌سه‌رچوون ده‌ده‌ن، زۆر سوپاسی هاووڵاتییان ده‌كه‌ین كه هاوكارمان بوونه و هیوادارین به‌رده‌وام بن له ئاگه‌داركردنه‌وه‌مان له هه‌ر حاڵه‌تێكی له‌مجۆره.
به‌ڕێوه‌به‌رایه‌تیی چاودێریی بازاڕی هه‌ولێر له 15 ڕۆژی یه‌كه‌می ڕه‌مه‌زان 800 سه‌ردانیان ئه‌نجام داوه و 135 شوێنیان سزا داوه، پێنج شوێنیان داخستووه و ده‌ستیان به‌سه‌ر 15 تۆن خۆراكی به‌سه‌رچوودا گرتووه.