ب مه‌ره‌ما مفا وه‌رگرتنا سكرێ دهۆكێ وه‌كو جهه‌كێ گه‌شوگوزاری، ره‌خ و رویێن سكرێ دهۆكێ دێ بیته كورنیش و ماسته‌رپلانا وێ ژی هاته دروستكرن.
ئەحمەد جەمیل رێڤەبەرێ گشتی یێ چاندنێ ل پارێزگەها دهۆکێ بۆ "وشه" گۆت، ب مەرەما جێبەجێکرنا ماستەر پلانا کۆرنیشا سکرێ دهۆکێ، مه وه‌كو رێڤەبەریا گشتی یا چاندنێ ل پارێزگەها دهۆکێ و ل گه‌ل سەروکاتیا لژنا کوژاندنێ ئەندامێن لژنێ، بەرهەڤیەکا ڤەدیتا خۆجهی ئەنجامدان بۆ کوژاندنا مافێ رەفتارکرنێ یێ خودانێن ئەردێن چاندنێ ب تایبه‌تی کەرتێ باجلورێ داكو بهێته چێكرن بۆ كورنیشێ سكرێ دهۆكێ.
زێده‌تر گۆت، جهێ كورنیشێ نیزیکی ٢٢ دۆنەمێن ئەردی نە ب درێژاهیا نێزیکی ١٩٠٠ مەتران بۆ مەرەما دورستکرنا کۆرنیشێ دهۆکێ د بەرژەوەندیا سەرۆکاتیا باژێرڤانیا دهۆکێ دا.
ناڤبری دیاركر ژی كو پرۆژێ کۆرنیشا بەنداڤا دهۆکێ ئێک ژ پرۆژێن گرنگ و ستراتیجی یێن کابینا نەهێ یا حکومەتا هەرێما کوردستانێ یە و گۆت ژی، نوکە دیزاینا پرۆژه‌یی هاتیە کرن و ب دوماهیکهاتنا ڤان پرۆژێن گەشتیاری، ژبلی کو دیمەنەکێ جوانتر دەنە بەنداڤی دێ بیتە ئەگەر بۆ پتر راکێشانا گەشتیاران ژی و پەیداکرنا سەدان دەلیڤێن کاری.
سكرێ دهۆكێ دكه‌ڤیته باكورێ باژێرێ دهۆكێ و ل سالا 1983ێ هاتیه چێكرن و نێزیكێ 52 ملیون مه‌ترێن سێجایێن ئاڤێ تێدا دهێنه كومكرن، روبه‌ره‌كێ به‌رفره‌هـ یێ ئه‌ردی بخوڤه دگریت و بۆ كه‌رتێ گه‌شتوگۆزارێ مفایه‌كێ باش هه‌یه، پشكه‌كا سكری كو پێكدهێت ژ هاڤینگه‌هێن گه‌لیێ دهۆكێ هاتینه چێكرن و وه‌كو جهه‌كێ گه‌شتیاری دهێته بكارئینان، ب چێكرنا كورنیشێ سكرێ دهۆكێ، دێ ره‌وشه‌كا دی یا گه‌شتیاری ده‌ت باژێرێ دهۆكێ.