پشتى نێزیكێ 20 رۆژان ل ژكاركه‌فتنا به‌له‌ما چه‌ند په‌نابه‌ران و گرتنا وان ژلایێ زێره‌ڤانێن ده‌ریارى ل وه‌لاتێ مسرێ، دوهى دوو په‌نابه‌رێن هه‌رێما كوردستانێ كو ئاكنجێن شێلادزێ بوون هاتنه زڤراندن و گه‌هشتن شێلادزێ.
نه‌زیر رێكانى، خالێ وان هه‌ردوو په‌نابه‌ران بۆ "وشه" گۆت "وه‌كو هه‌موو گه‌نجێن كوردستانێ ئه‌ڤێن چوینه ژ ده‌رڤه، دوو خارزایێن من ژى بناڤێ ئوسامه عومه‌ر و زێره‌ڤان نه‌زیر، به‌رى سێ هه‌یڤان ب رێیا توركیا ب قاچاغى قه‌ستا ده‌رڤه كر، به‌لێ جهێ داخێ یه رۆژا 23/10 به‌له‌ما وان ب رێیا ئیتالیاڤه ل نێزیك كه‌نارێن ده‌ریایێ ل مسرێ ژكاردكه‌ڤیت و دیمننن ده‌ریارێ دا، پاشان ژلایێ زێره‌ڤانێن ده‌ریایى ل مسرێ دهێنه رزگاركرن و دهێنه گرتن و زیندانكرن، پشتى نێزیكێ 20 رۆژان دهێنه ئازادكرن و دوهى 13/11 گه‌هشتن شێلادزێ"
زێده‌تر گۆت "داخوازێ ل جهێن شوله‌ژێ دكه‌ین كو هه‌ڤكاریا گه‌نجان بكه‌ن د په‌یداكرنا ده‌لیڤێن كارى و باشتركرنا ره‌وشا ژین و ژیارا وان داكو ئه‌و ژى قه‌ستا ده‌رڤه نه‌كه‌ن و بارگرانیا دارایى ل سه‌ر خێزانێن خوه دروست نه‌كه‌ن و ب رێڤه ژى مه‌ترسى ل سه‌ر ژیانا وان دروست نه‌بیت"
ب گوره‌ى ئامارێن تورا هه‌ماهه‌نگى یا رێكخراوان د ده‌ما سێ هه‌یڤێن بورى دا 935 گه‌نجێن پارێزگه‌ها دهۆكێ قه‌ستا ده‌رڤه كریه و ئارمانجا وان ئه‌وه كو نه‌زڤرن ڤه، دیسان ب گوره‌ى ئامارێن رێكخراوا ئه‌لند بۆ دیموكراسیكرنا گه‌نجان ل پارێزگه‌ها دهۆكێ و ده‌زگه‌هێ خێرخوازى كوردستان ژ وان گه‌نجێن قه‌ستا ده‌رڤه‌كرى چاره‌نڤیسێ 27 په‌نابه‌ران نه‌دیاره، هه‌تا نوكه دوو ژ وان په‌نابه‌ران گیانێ خوه ژده‌ستدایه كو ئێك خه‌لكێ شێلادزێ یه و ئێك ژى خه‌لكێ باتیفایه.