دیاره ل هه‌موو وه‌لاتێن جیهانێ زاروك كاردكه‌ن، هه‌رێما كوردستانێ ژى ئێكه ژ وان وه‌لاتێن جیهانێ ب تایبه‌تى پشتى دروستبوونا قه‌یرانێن دارایى هژمارا وان زاروكێن كار دكه‌ن دزێده‌بوونێ دایه، رێڤه‌به‌ریا گشتى یا گه‌شه‌پێدانا جڤاكى ل پارێزگه‌ها دهۆكێ دیاركر كو تنێ ل باژێرێ دهۆكێ پترى 250 زاروك كاردكه‌ن.
فایزا عه‌بدولواحد، رێڤه‌به‌را یه‌كا پاراستنا زاروكان ل رێڤه‌به‌ریا گشتى یا گه‌شه‌پێدانا جڤاكى ل پارێزگه‌ها دهۆكێ دیاركر ئه‌وان پلانه‌ك بۆ دوڤچون ل سه‌ر وان زارۆكێن كار دكه‌ن دانایه و بۆ "وشه" گۆت، كاركرنا زاروكان ئێكه ژ دیاردێن جیهانى و ل هه‌موو وه‌لاتان هه‌یه، دیاره ل هه‌رێما كوردستانێ ژى هژماره‌كا زۆر یا زاروكان كار دكه‌ن، ل سنوورێ پارێزگه‌ها دهۆكێ ژى هژماره‌كا زورا زاروكان هه‌نه و كار دكه‌ن ب تایبه‌تى وان یێن ل خوار ژیێ 15 سالیێ به‌لێ جهێ داخێ یه هه‌تا نوكه چوو روپێڤان و دوڤچون ل سه‌ر نه‌هاتینه‌كرن"
زێده‌تر گۆت "ب گوره‌ى روپێڤانه‌كا ساده، تنێ ل سه‌نته‌رێ باژێرێ دهۆكێ پترى 250 زاروك هه‌نه كار دكه‌ن، پشكه‌ك ژ وان ل سه‌ر جادده و ناڤا بازاڕان و جهێن گشتى كار دكه‌ن، ئه‌ڤ یه‌ك جهێ دلگرانیێ یه، وه‌كو رێڤه‌به‌ریا گشتى یا گه‌شه‌پێدانا جڤاكى مه پلانه‌ك هه‌یه و دێ دوڤچونێ ل سه‌ر هه‌موو وان زاروكان كه‌ین كو ل ده‌ڤه‌رێن جودایێن سنوورێ پارێزگه‌ها دهۆكێ كار دكه‌ن"
رێڤه‌به‌را یه‌كا پاراستنا زاروكان ل رێڤه‌به‌ریا گشتى یا گه‌شه‌پێدانا جڤاكى ل پارێزگه‌ها دهۆكێ دیاركر ژى كو پلانا وان دێ ب هه‌ڤكاریا رێكخراوا مندالپارێزیا كوردستانێ و رێڤه‌به‌ریا كار و بنگه‌هێن پولیسێن سنێلان و ده‌زگه‌هێن په‌یوه‌ندیداریێن حوكمى و كه‌رتێ تایبه‌ت بیت و گۆت ژى "پلان دێ بو ده‌ما ساله‌كێ بیت و تێدا هه‌موو هوركاریێن وان زاروكان بخوڤه گریت ئه‌وێن كار دكه‌ن، هه‌ند ل سه‌ر كه‌ساتیان وان هه‌ند ژى ل سه‌ر جهێ كارى و جورێ كارى و ره‌وشا ژیانا وان یا گشتى بیت، ب تایبه‌تى وان زاروكێن ل خوار ژیێ 15 سالى، پلانێ دار ون بیت كا زاروك چه‌ند و چه‌وا بشێن هاریكاریا وان بهێته‌كرن"